Mozambique: Ingabo za Leta  zishe Abarwanyi benshi

Muri Mozambique, umuyobozi w’ingabo z’igihugu zirwanira mu mujyi wa Palma, General Chongo Vidigal, avuga ko bishe abaterabwoba benshi. Abanyamakuru basuye Palma, mu ntara ya Cabo Delgado, mu majyaruguru y’igihugu ya Mozambique, bwa mbere kuva inyeshyamba zihigaruriye mu kwezi gushize.

General Vidigal yababwiye ko imirwano itararangira neza, ariko ko babohoje umujyi hafi ya wose, kandi ko bishe abaterabwoba benshi. Yasobanuye ko bakibabarura. Umubare w’abantu bose bahitanywe n’intambara nawo nturamenyekana neza.

Abanyamakuru babonye imirambo mike mu mihanda, amazu yabomaguritse, n’imodoka zabaye imiyonga. Ibitaro, amabanki, n’inyubakwa za leta byarasenyutse.

General Vidigal yabwiye abanyamakuru ko iriba rya gaz ryo ntacyo ryabaye kandi ko naryo riri mu maboko y’ingabo ayoboye. Palma ikize kuri gaz cyane, gaz icukurwa n’ikigo Total cyo mu Bufaransa nk’uko bitangazwa na Radio Ijwi ry’Amerika.

Umujyi wa Palma wigaruriwe ku itariki ya 26 y’ukwezi gushize n’inyeshyamba zivuga ko ari iz’Umutwe wa Leta ya Kislamu. Zari zarawuteye bwa mbere mu 2017. Umuryango w’Abibumbye uvuga ko kuva icyo gihe abaturage barenga 670,000 bavuye mu byabo mu ntara ya Cabo Delgado.





Tanga igitekerezo kuri iyi nkuru



Igitekerezo