Médiatrice amaze imyaka umunani muri koma azira ikinya yatewe n’umuganga

Amakuru y’umurwayi watewe ikinya agiye kubyara, akaba amaze imyaka umunani agisinziriye si mashya, yagarutsweho cyane mu itangazamakuru ndetse anacicikana ku mbuga nkoranyambaga.

Mu 2010 nibwo Dusabimana Médiatrice yatewe ikinya, ku bw’amahirwe make bimuviramo gukomeza kuryama aho ubu ari mu Bitaro bya Kanombe aho yitabwaho buri munsi.

Inzobere mu mwuga w’ubuforomo zivuga ko rimwe mu masomo akomeye ahabwa abari ku ntebe y’ishuri, ari ukwita ku murwayi uryamishijwe igihe kirekire ndetse ngo ni nk’igitangaza ko amara igihe kingana gutya.

IGIHE yasuye Dusabimana wabyaranye na Ntahobavukira Alexis, mu rugendo rwari rugamije no kumenya ibanga abaganga bakoresheje ngo abe ameze neza nta bisebe n’ibindi bimungu mu myaka umunani amaze aryamye, adakanguka.

Mu bijyanye n’ubuvuzi hari isomo ryihariye ryigisha kurinda umurwayi uryamishijwe igihe kinini kwangirika k’umubiri n’amagufa. Kurinda ko umubiri uzaho ibisebe bituma hakumirwa microbe yinjiramo, igatera urupfu ruhutiyeho, mu cyo abaganga bita “Septicemia”, ubwandu (infection) butembera mu maraso.

Dusabimana yitabwaho mu buryo bwihariye aho ahabwa ifunguro hifashishijwe udupira twabugenewe, akuhagirwa no guhindukizwa ngo ingingo zidahinamirana.

Kwita kuri Dusabimana umaze imyaka umunani mu bitaro ntibyorohera umurwaza n’abaforomo bamukurikirana uko bucyeye.

Mukandayisenga Divine umurwaje kuva mu 2010 yatangarije IGIHE ko ameze neza. Yagize ati “Ubuzima bw’umurwayi nta kibazo, ibitaro ni byo bimwitaho mu bishoboka byose, urumva ko rero umurwayi nta kibazo ameze neza.”

Mukandayisenga yagaragaje ko agihura n’ibibazo ahanini bishingiye ku mikoro y’ibibatunga ariko ibitaro bimugoboka ku buzima bw’umurwayi we.

Umuforomokazi ukurikirana Dusabimana buri munsi, Iduhoze Yvonne, yavuze ko bafite inshingano zo gufasha umurwayi ngo atagira ikibazo.

Iduhoze yagarutse ku buryo bwifashishwa mu kwita ku murwayi. Yagize ati “Tumuhindukiza nibura buri masaha ane, kumugaburira hifashishijwe udupira tunyuzwa mu mazuru, kumusasira no kumugirira isuku ku buryo buhoraho. Dufatanya n’abashinzwe kugorora ingingo (Physiotherapists) kugira ngo hatabaho guhinamirana, ari nabyo bituma umurwayi agejeje iki gihe nta kibazo kidasanzwe afite, cyiyongera ku cyo asanganywe cyo kudakanguka.”

Uyu muforomo yishimira ko abaganga bahora bakorera hamwe, aho umwe yisobye akagisha inama mugenzi we, aho we yemeza ko ariryo banga bakoresha kugira ngo Médiatrice akomeze kumererwa neza.

Umurwayi ahera mu kinya byagenze bite?

Abatera ibinya bagerageza kwirinda ko hashobora kubaho impanuka yo kudakanguka mu gihe umurwayi yamaze kubagwa.

Dr Muhizi Jérôme yasobanuye ko uretse impanuka nk’iyo Dusabimana yahuye nayo, bigoye ko umurwayi ikinya kimuheramo.

Yavuze ko nta makuru afite ku mpanuka Dusabimana yagize ariko ko mu myaka yashize hari ubwoko bw’ibinya byo mu bwoko bwitwa ‘Isobar’, byari bikoze mu buryo bugoye kugenerwa aho bitagomba kurenga mu gace kagenwe kubagwa ku muntu.

Ubuvuzi bwa none buri kwifashisha ubwoko bw’ibinya byoroshye kugenzura byo mu bwoko bwa ‘Hyperbare’, byoroshye kugena ahantu ntarengwa bitagomba kurenga; ibi biri no mu bituma umuti watewe umurwayi udashobora kurenga umupaka wagenewe, bikaba imwe mu mpamvu nyinshi zishobora gutuma atagira ibindi bibazo nyuma yo kubagwa.





Tanga igitekerezo kuri iyi nkuru



Igitekerezo