Marina yasabye imbabazi nyuma kwibasira Charly na Nina

Umuhanzikazi uri mu bari kuzamuka neza muri iki gihe, Marina, yasabye imbabazi itsinda rya Charly na Nina ndetse n’abakunzi baryo nyuma y’amagambo yarivuzeho.

Mu gitaramo cyabereye i Rusizi ku wa 19 Ugushyingo, cyari kiri mu byateguwe n’inzu ya The Mane abarizwamo byiswe ‘Simbuka tour’; Marina yibasiye aba bakobwa bagenzi be.

Icyo gihe yari ari kuririmba indirimbo yise ‘Marina’ agezemo hagati, araririmba ati “Yararahiye ko atazakunda natabona Marina, bamuha Shyari na Nyina bashyiraho na Butera aratsemba ngo yikundira Marina.”

Ubundi aka gace ko mu ndirimbo ye gasanzwe kavuga kati “yararahiye ko atazakunda natabona Marina, bamuha Charly na Nina bashyiraho na Butera aratsemba ngo yikundira Marina.”

Nyuma y’amashusho ya Marina yibasira Charly na Nina, benshi bakanenga iyi myitwarire ye yasabye imbabazi ku bakomerekejwe n’igikorwa cye.

Mu magambo yanditse ku rukuta rwe rwa Instagram, yavuze ko benshi bamwumvise nabi kuko atari agambiriye kwibasira ‘bakuru be mu muziki’.

Ati “Niseguye kuri buri umwe wese haba mu rwego rw’abafana cyangwa abanyarwanda muri rusange cyane cyane Charlotte Rulinda na Muhoza Nena waba yarafashe nabi kuba narise aba bakobwa ngo shyari na nyina.”

“Nta rundi rwango mbafitiye nkuko ngenda mbisoma mu bitekerezo ku mbuga nkoranyambaga kandi ndabubaha nka bakuru banjye mu muziki. Mbere na mbere umuziki w’u Rwanda.”

Marina si ubwa mbere yibasiye iri tsinda kuko hari n’igihe higeze kujya hanze amajwi ari kuririmba indirimbo yaba bakobwa bise ‘Indoro’ yashyizemo ibishegu.

Icyo gihe aho kuvuga ‘Indoro’ we yivugira ibindi bijyanye n’imyanya y’ibanga y’abagabo, nabwo byakuruye umunabi benshi baramwibasira ariko we ahakana avuga ko atatinyuka kuririmba ibintu nk’ibyo.

src : Igihe





Tanga igitekerezo kuri iyi nkuru



Igitekerezo