MINEDUC iri gusuzuma ibirimo isoko ryihariye rya Mwalimu

Minisiteri y’Uburezi mu Rwanda (MINEDUC) n’Ikigo gishinzwe Uburezi (REB) byagaragaje ko hari ibyifuzo bitandukanye abarimu bagiye batanga ngo imibereho yabo irusheho kugende neza, bikiri kwigwaho birimo kugira isoko ryabo ryihariye n’ibindi.

Aya makuru umuntu yavuga ko anejeje ku barimu, yatangajwe ku wa 5 Ukwakira ubwo hizihizwaga umunsi ngarukamwaka wahariwe Mwarimu.

Mu bihe bitandukanye abarimu bakunze kugaragaza imbogamizi bahura na zo zirimo amikoro make aterwa no kuba umushahara bahabwa utabasha guhangana n’ibiciro biri ku masoko, no kuba koperative Umwalimu SACCO, idatanga inguzanyo ihagije, bigatumwa hari imishinga yagutse umwarimu atabasha gutangira.

Umuyobozi Mukuru wa REB, Dr Ndayambaje Irenée, yavuze ko hari gutekerezwa ku ishyirwaho ry’iguriro ry’abarimu n’izindi gahunda zigamije kunganira amikoro y’abarimu.

Yagize ati “Hari agaseke karimo ibyifuzo n’ibitekerezo bitandukanye, abarezi bakomeje gutanga mu bihe byatambutse. Muri byo harimo iguriro rya mwarimu rizaba ririmo iby’ibanze bikenerwa bizaba bihendutse, kandi rikazegerezwa abarimu hirya no hino mu gihugu.”

Yakomeje agira ati “Hari no kuba abana b’abarimu bazajya bafashwa mu mashuri. Hari kandi n’ibijyanye no kuvugurura umushahara w’abarimu ukajyana n’ibiciro biri ku masoko. Minisitiri w’Uburezi yavuze ko ibyo byose bizwi, bishatse kuvuga ko bizakomeza kuganirwaho n’inzego zinyuranye mu gihigu, kandi bigasubizwa.”

Minisitiri w’Uburezi, Dr Uwamariya Valentine, yijeje abarimu ubuvugizi, bihereye ku kongera amafaranga muri Koperative Umwalimu Sacco.

Yagize ati “Kuba wazamura umushahara kugeza aho umuntu yumva anyuzwe, biragoye kandi byafata igihe kinini. Turi kubakorera ubuvugizi, ku buryo mu ngengo y’imari umwaka utaha ikigega cya SACCO cyazongerwamo amafaranga, kikabasha gufasha abarimu.”

Ku rundi ruhande ariko hari n’ibyakozwe mu rwego rwo kuvugurura umwuga w’ubwarimu mu Rwanda. Muri ibi harimo kuvugurura sitati igenga umwuga w’ubwarimu mu Rwanda aho hashyizweho ibyiciro bizajya bituma bazamurwa mu ntera mu kazi ndetse no mu mushahara ku buryo bizaha imbaraga abakiri bato bifuza gukora uyu mwuga.

Mu 2012 kandi nibwo Guverinoma y’u Rwanda yatangije gahunda yo kubakira abarimu amacumbi hagamijwe kugira ngo abakorera mu bice by’icyaro babone ahantu hiyubashye ho gucumbika kandi habereye mwarimu.

Mu bindi byakozwe harimo gahunda nka Girinka Mwalimu, kuborohereza kwiga, mudasobwa ku barimu n’ibindi.

Haravugwa ibi mu gihe umuyobozi w’Ishyaka riharanira Demokarasi no kurengera Ibidukikije, “Democratic Green Party”, akaba n’Umudepite mu Nteko Ishinga Amategeko y’u Rwanda, Dr. Frank Habineza yakunze kumvikana mu bihe bitandukanye asabira abarimu ibirimo kongererwa umushahara.

Uyu munyapolitiki ibi yabisabiye abarimu mu Nteko Ishinga Amategeko y’u Rwanda, umutwe w’Abadepite ku wa 12 Kamena 2020, ubwo Komisiyo y’Uburezi, Ikoranabuhanga, Umuco n’Urubyiruko mu Nteko batangaga raporo ku masuzuma bakoreye mu Ntara z’igihugu n’Umujyi wa Kigali kuva ku wa 03 kugeza ku wa 14 Gashyantare 2020 ubwo basuzumaga ibibazo biri mu burezi bw’igihugu.

Nyuma yo kugezwaho ibibazo biri mu burezi bw’u Rwanda, Depite Frank Habineza yatanze ibitekerezo bitatu byafasha mu kubaka ireme ry’uburezi avuga ko kuba bidakorwa ari imwe mu mpamvu z’ingenzi zituma ireme ry’uburezi mu Rwanda rikomeza kudindira.

Depite Frank Habineza yasabye Leta y’u Rwanda ibintu bitatu bikomeye yakorera abarimu birimo gushyiraho isoko ryihariye rya Mwalimu rimworohereza guhaha ku buryo na we yazajya ahaha ku biciro bito nkuko byakorewe abashinzwe umutekano barimo abasirikare, abapolisi n’abacungagereza.

Kugaburira ku mashuri abana biga bataha bagahabwa nibura igikoma cy’ibigori cyangwa se kivanze saa yine za mu gitondo cyangwa saa sita z’amanywa no kongera umushahara wa Mwalimu kubera ko ngo amafaranga aherutse kongererwaho byagaragaye ko atigeze yongera ubushobozi bwabo.

Mu mwaka ushize wa 2019 mu kwezi kwa Mbere nibwo Guverinoma y’u Rwanda yasubije icyifuzo abarimu bo mu mashuri abanza n’ayisumbuye bari bamaranye imyaka myinshi cyo kuba bakongererwa umushahara kuko uwo bahabwa utakijyanye n’igihe n’isoko, bigatuma imibereho yabo iguma hasi ugereranyije n’iy’abandi bakozi ba Leta.

Icyo gihe Leta yabongereyeho 10% by’ayo bahembwa gusa n’ubundi nyuma bakomeje kugaragaza ko ayo bongereweho akiri makeya.

PAC yasohoye Gitifu wa Nyamagabe mu cyumba, icyifuzo cya Sankara kuri Rusesabagina cyashyizwe mu ngiro imanza zabo zirahuzwa kimwe n’abandi bahoze muri FLN:





Tanga igitekerezo kuri iyi nkuru



Igitekerezo