Leta ya Uganda yaburiye abayoboke ba Bobi Wine ko uzahirahira akambara ingofero itukura ya Bobi Wine azatabwa muri yombi n’igipolisi.

Abatera ingabo mu bitugu uyu muhanzi waje kuvamo umunyapolitiki utarya indimi mu kunenga ubutegetsi bwa Perezida Museveni, babwiwe ko iyi ngofero itukura ari umwambaro wa Gisirikare bityo ko ntawugomba kongera kuwambara kuko n’uzabigerageza azahita afungwa.

Bobi Wine uteganya kuziyamamariza kuyobora Uganda mu matora yo muri 2021 yemeza ko iriya ngofero ari ikirango cyerekana ko abaturage barambiwe ubutegetsi bwa Perezida Yoweli Museveni, ko bashaka impinduka.

Mu igazeti ya Leta iherutse gusohoka handitse mo ko iriya ngofero yemewe kwambarwa n’abasirikare gusa bityo ko umusivili uzayambara azagezwa imbere y’ubutabera icyaha cyamuhama agakatirwa igifungo kigera ku myaka itanu.

Umuvugizi w’ingabo za Uganda witwa Brig Gen Richard Karemire yagize ati “Uriya mwenda wemewe kwambarwa n’ingabo zacu gusa kandi byanditse mu igazeti ya Leta.”

Kugeza ubu Robert Kyagulanyi uzwi cyane ku izina rya Bobi Wine ntacyo aratangaza kuri iki cyemezo, ariko umwe mu bayoboke be b’imena witwa Ivan Boowe yavuze ko bazakomeza kuyambara kuko ari ingofero yerekana ubushake bw’impinduka.

Ati “Nta kintu kizadutera ubwoba kugira ngo dutezuke ku ntego yacu yo guharanira uburenganzira bwacu. Twiteguye guhangana n’icyemezo cyose Guverinoma izafata".

Muri Kenya naho Leta yigeze guca ibyo kwambara ingofero y’umukara yambarwaga n’abashakaga impinduka ariko byarayigoye kuko ziriya ngofero zigurishwa ahantu hose, ibi bikaba bizagora na Uganda.

Brig Gen Richard Karemire yahaye gasopo abayoboke ba Bobi Wine ko uzahirahira akambara ingofero itukura ya Bobi Wine azatabwa muri yombi n’igipolisi

@Umubavu.com

---

---