Kompanyi ya Boeing yahagaritse indege zose zo mu bwoko bwa 737 Max

Kompanyi Boeing yahagaritse indege zose zo mu bwoko bwa 737 Max nyuma y’aho abashakashatsi baboneye ibimenyetso bishya ku mpanuka y’indege ya Ethiopian Airlines.

Iyi kompanyi yo muri Leta Zunze Ubumwe za Amerika ikora indege yatangaje ko yahagaritse indege 371 zose.

Ubuyobozi bw’ikigo gishinzwe ingendo z’indege muri Leta Zunze Ubumwe za Amerika, FAA mu mpine z’Icyongereza, butangaza ko ibyemezo bishya n’ibimenyetso bitangwa n’ibyogajuru (Satellites) byatumye hafatwa icyo cyemezo ko izo ndege ziba zihagaritswe.

FAA ifite itsinda riri gukora iperereza rifatanyije n’ikigo cya Amerika gishinzwe kwita ku buzima bw’abagenzi, aho iyo mpanuka y’indege ya Ethiopian Airlines yabereye ku cyumweru gishize.

Dan Elwell uyoboye FAA mu buryo bw’agateganyo ejo ku wa gatatu yatangaje ko impande zompi zabonye ko hari isano riri hagati y’impanuka y’indege ya Ethiopian Airlines na Kompanyi ya Lion Air yo muri Indonesia.

Yongeyeho ati: "Ibimenyetso twabonye aho iyo mpanuka yabereye birasa cyane n’iby’impanuka y’indege ya Lion Air".

Mu ntangiriro Perezida Donald Trump wa Amerika yari yatangaje ko FAA ishobora gufata icyemezo kihuse ifatiye ku makuru mashya n’ibyemezo byavuye aho iyo mpanuka yabereye ndetse no mu bindi bice, bafatiye kandi no ku yandi makuru".

Iyo kompanyi Boeing yo ubwayo yari yatangaje ko ikizeye ko indege zayo za 737 Max nta ngorane zifite.

Ariko iyo kompanyi yongeyeho ko, imaze kuvugana n’ubuyobozi bwa FAA n’ikigo cya Amerika gishinzwe kwita ku buzima bw’abagenzi, yafashe icyemezo cyo guhagarika izo ndege, muri gahunda yo kwizeza abasanzwe bafata iyo ndege ko nta kibazo gihari.

Dennis Muilenburg, umuyobozi wa kompanyi Boeing, avuga ko bari kumwe n’abashakashatsi barimo bakora ibishoboka byose kugira ngo bamenye icyateye izo mpanuka zompi, bongere bakomeze umutekano w’izo ndege, kugira ngo ibyabaye bitazasubira.

Ku ruhande rwe, Sara Nelson uyoboye ishyirahamwe ry’abakozi bo mu ndege (Association of Flight Attendants-CWA) avuga ko ikiza imbere ya byose ari ubuzima bw’abantu.

Ati: "mbere ya byose ni ubuzima bw’abantu. Ariko kandi n’izina naryo rikeneye kwitabwaho. Iryo zina naryo si Boeing, ni Amerika. Icyo ari cyo Amerika mu byerekeye gukora no gukoresha indege ku isi".

Kugeza ku munsi wejo ku wa gatatu, ubuyobozi bw’ikigo gishinzwe ingendo z’indege, FAA, bwatangaje ko iperereza ryerekanye ko nta kibazo na kimwe cy’ikoranabuhanga iyo ndege ifite, bityo ko rero nta gituma yari guhagarikwa.

Hagati aho, ibihugu byinshi byari byahagaritse iyo ndege nyuma y’impanuka y’indege ya Ethiopian Airlines yahitanye abantu 157.

Iyo mpanuka yari ibaye kabiri mu mezi atanu, nyuma y’indi y’iyo ndege ya Kompanyi Lion Air yabaye mu kwezi kwa cumi k’umwaka ushize wa 2018 nayo yahitanye abantu 189.

PNG - 457.4 kb
Abaturage bashyitse ahabereye impanuka y’indege ya Ethiopian Airlines
PNG - 212.3 kb
Indege Boeing 727 Max 8, ya Kompanyi ya Amerika, American Airlines

@Umubavu.com





Tanga igitekerezo kuri iyi nkuru



Igitekerezo