Kigali: Guhana intera Nyabugogo byanze bamwe bategekwa kujya gutegera I Nyamirambo muri Stade

Nyuma yuko ku mbuga nkoranyambaga zitandukanye hacicikanye amafoto agaragaza abagenzi bari muri Gare ya Nyabugogo mu Mujyi wa Kigali bahagaze mu buryo bucucitse ku buryo ibyo guhana intera birinda icyorezo cya COVID-19 kiri kuvuza ubuhuha mu Rwanda kimwe n’ahandi ku isi, Umujyi wa Kigali n’inzego zirimo Polisi y’Igihugu ari na yo ishinzwe umutekano wo mu muhanda, bafashe icyemezo cyo kwimurira aho abantu bajya mu Ntara bategera imodoka aho ubu bamwe bari kujya kuzitegera kuri Stade ya Kigali iri I Nyamirambo mu Karere ka Nyarugenge.


Aya mafoto yacicikanye ku mbuga nkoranyambaga bivugwa ko ari ayafatiwe muri Gare ya Nyabugogo aho bigaragaza ko guhana intera bidashoboka kubera umubyigano w’abagenzi

Iki cyemezo gifashwe nyuma y’uko kuva mu ntangiro z’iki cyumweru by’umwihariko ku wa Gatatu tariki 23 Ukuboza 2020, abantu benshi bakomeje gutega imodoka bava mu Mujyi wa Kigali bajya kwifatanya n’abo mu miryango yabo gusoza iminsi mikuru irimo Noheli iteganyijwe ku munsi w’ejo ndetse n’Ubunani buzaba mu cyumweru gitaha.

Amakuru agera k’UMUBAVU aravuga ko aberekeza mu Majyepfo y’igihugu bose kimwe n’abarekeza mu gice cy’Uburengerazuba mu Turere twa Rusizi, Karongi, Nyamasheke na Ngororero, ari bo bari kujya gufatira imodoka i Nyamirambo kuri Stade mu gihe abasigaye bose barakomeza gutegera muri Gare ya Nyabugogo.

Ubwinshi bw’abantu bwagaragaye muri Gare ya Nyabugogo ku wa Gatatu ndetse no mu gitondo cyo kuri uyu wa Kane ni bimwe mu byatumye ubuyobozi bw’Umujyi wa Kigali bushyiraho ingamba zo kugabanya umuvundo ushobora guha icyuho ubwandu bwa Coronavirus.

Muri urwego rwego ubuyobozi bw’Umujyi wa Kigali bwahise bwimurira imodoka zitwara abantu mu Ntara kuri Stade ya Kigali iri i Nyamirambo.

Umujyi wa Kigali ubinyujije kuri Twitter wavuze ko na Stade ya Kigali ihindutse aho gutegera imodoka ndetse abarebwa n’iki cyemezo cyo gutegera muri iyi Stade ari abajya mu Ntara y’Amajyepfo n’iy’Iburengerazuba mu Turere twa Rusizi, Karongi, Nyamasheke na Ngororero.

Itangazo rigira riti “Mu kugabanya ubucucike i Nyabugogo ahategerwa imodoka, aberekeza mu Majypefo bose n’aberekeza mu gice cy’Iburengerazuba mu Turere twa Rusizi, Karongi, Nyamasheke na Ngororero barimo kujya gufatira imodoka i Nyamirambo kuri stade, abasigaye bose barakomeza gutegera Nyabugogo.”

Ku mugoroba wo kuri uyu wa Gatatu mu Rwanda habonetse abantu 87 biganjemo abo mu mujyi wa Kigali banduye Covid-19 bituma umubare w’abamaze kuyandura kuva igaragaye mu gihugu muri Werurwe uba 7,598. Muri bo, 6163 barayikize naho 66 yarabishe nkuko imibare ya Minisiteri y’Ubuzima ibivuga.


Ubu ushaka kujya mu Ntara by’umwihariko Amajyepfo n’Iburengerazuba arajya gutegera imodoka muri Stade ya Kigali iri I Nyamirambo

Impinduka zikomeye muri ADEPR! Depite Frank Habineza yasabye ko umusoro w’ubutaka ugabanywa ategekwa gushaka ahandi iyo misoro izava:





Tanga igitekerezo kuri iyi nkuru



Igitekerezo