Kenya: Umuntu wa mbere yakize COVID-19, Kenyatta agabanya imisoro

Mu gihe ibihugu byinshi hirya no hino ku Isi bikomeje urugamba rwo guhangana n’icyorezo cya COVID-19, hari n’ibiri kugira amahirwe bamwe mu bagaragaje ibimenyetso by’iki cyorezo bakagikira, aha ni nk’amakuru y’ihumure muri Kenya avuga ko umuntu wa mbere yakize Coronavirus.

Aya makuru yemejwe na Perezida wa Kenya Uhuru Kenyatta mu ijambo yagejeje ku banyagihugu, icyakora ntabwo yavuze umwirondoro w’uwakize iyi ndwara, gusa yavuze ko ari amakuru meza kuri iki gihugu ndetse ko hari n’icyizere ko nabandi barakira.

Kenya ubu ifite abantu 28 bamaze kwandura iyi ndwara, harimo batatu bashya batangajwe ejo na Perezida Kenyatta. Ni mu gihe mu Rwanda bamaze kuba 41.

Birakekwa ko uwakize iyi ndwara ari mu bantu batangajwe bwa mbere ko bayanduye muri Kenya.

Abahanga mu buvuzi bavuga ko umuntu ufite ibimenyetso bidakabije ashobora gukira iyi virus mu byumweru bibiri.

Umuntu wa mbere yabonywemo iyi ndwara muri Kenya tariki 12 Werurwe 2020 bitangazwa na minisiteri y’ubuzima yaho nyuma y’umunsi umwe.

Perezida Kenyatta yavuze ko mu gihugu hose guhera ku wa gatanu, kuva saa moya z’umugoroba (7PM) kugeza saa kumi n’imwe za mugitondo (5AM) hazajya haba umukwabu.

Uyu mukwabu ugamije gutegeka abantu kuguma mu ngo zabo mu rwego rwo kwirinda ikwirakwira ry’iyi ndwara.

Perezida Kenyatta yatangaje kandi ivanwaho ry’imisoro yose ku bantu bahembwa amadorari $240 ku kwezi (ni arenga gato 200,000Frw), naho abandi bakajya bishyura umusoro ungana na 5% gusa.

Leta yagabanyije kandi imisoro ku mitungo ndetse n’umusoro ku nyongera gaciro (TVA), ibi bigatangira gukurikizwa kuva tariki 01/04/2020.

Hejuru y’ibi, Kenyatta yatangaje ko ku bushake bwe, n’abandi bategetsi bakuru bemeye gutanga ku mushahara wabo kugira ngo batere inkunga ikigega cyo kurwanya Covid-19.

Perezida Kenyatta na Visi Perezida William Ruto batanga 80% y’umushahara wabo mu gihe abagize guverinoma bo bazagabanya 30% ku mushahara wabo.

Yanatangaje ko leta yagennye miliyoni $100 z’amadorari yo kugoboka abakennye kurusha abandi bari kugirwaho ingaruka n’iyi ndwara, abantu bakuze ndetse n’impfubyi.

COVID-19: Inzara igiye kutwica, maze Kabiri ntarya, Leta nidufashe naho ubundi ubuzima bumeze nabi:





Tanga igitekerezo kuri iyi nkuru



Igitekerezo