Kenya: Bamaganye  urukingo rwa Covid-19  ngo ruri mu igeregeza

Ihuriro ry’abaganga b’abakristu gatolika muri Kenya ryasohoye itangazo riburira abantu ku nkingo za Covid-19, rivuga ko urwo rukingo rudakenewe.

Catholic Doctors Association of Kenya isaba abafite ibimenyetso bya Covid gukoresha uburyo bwo kwiyuka (steam) cyangwa imiti nka hydroxychloroquine na ivermectin - imiti itaremejwe na WHO/OMS ko ivura abarwaye Covid-19.

Iryo tsinda ryavuze ibi mu gihe Kenya imaze kwakira doze zirenga miliyoni imwe z’urukingo rwa Oxford-AstraZeneca.

Uhagarariye OMS muri Kenya yabwiye abanyamakuru ko ibyatangajwe n’itsinda ry’aba baganga nta shingiro bifite kuko urukingo rwagenzuwe n’abahanga mbere yo kwemezwa nk’uko bitangazwa na BBC.

Iri tsinda ry’abaganga ryo rivuga ko uru rukingo n’izindi zikiri "mu igerageza".
Kiliziya gatolika muri Kenya yahakanye ibivugwa n’iryo tsinda ry’abaganga, ivuga ko ishyigikiye urwo rukingo.

Arkepiskopi Anthony Muheria yagize ati: "Papa Francis niwe ukuriye Kiliziya, kandi yavuze mu buryo bweruye ku rukingo. Biremewe ko tuzifata…Birakwiye ko zigenzurwa nk’izindi nkingo zisanzwe kandi ibyo minisiteri y’ubuzima niyo igomba kubikora".

Mu 2019 Kiliziya gatorika muri Kenya yanze ko abakobwa baterwa urukingo rurinda kanseri y’inkondo y’umura (HPV), no mu 2014 yamaganye gahunda yo gukingira tetanus.





Tanga igitekerezo kuri iyi nkuru



Igitekerezo