Karongi: Umugabo afungiwe guha ruswa inzego zishinzwe umutekano

Umugabo witwa Habimana Daniel w’imyaka 30 arafunzwe nyuma yo guha ruswa y’amafaranga y’u Rwanda ibihumbi 235 inzego z’umutekano. Uyu mugabo yafashwe mu rukerera rwo ku itariki ya 28 Kamena mu murenge wa Gishyita ubwo yafatanwaga imifuka 30 ya Caguwa ndetse n’amakarito 2 y’ikinyobwa kitujuje ubuziranenge cya Tangawizi.

Umuvugizi wa Polisi y’u Rwanda mu Ntara y’Iburengerazuba, Chief Inspector of Police (CIP) Innocent Gasasira avuga ku ifatwa ry’uyu mugabo yagize ati, "Kugira ngo tumufate; byatewe n’amakuru twari tumaranye iminsi twahawe n’abaturage ndetse n’imikoranire y’inzego zishinzwe umutekano. Twari dufite amakuru ko hari abantu binjiza mu gihugu caguwa y’imyenda ku buryo bunyuranyije n’amategeko noneho uriya munsi abanyerondo ubwabo nibo babonye uriya mugabo arimo kwambutsa iriya caguwa y’imyenda aciye mu Kiyaga cya Kivu, barabitumenyesha turamufata. Akimara kubona ko yafashwe, yatanze ruswa y’amafaranga yavuzwe haruguru kugira ngo bamureke agende n’ibyo yafatanwe ariko ntibyamushobokera. Ubu afungiwe kuri sitasiyo ya Polisi ya Gishyita mu gihe Urwego rw’igihugu rw’ubugenzacyaha rurimo gukurikirana iki kibazo.

Turashima iyi mikoranire myiza ndetse n’uruhare ntagereranywa rw’abaturage mu kutugezaho amakuru atandukanye ari na yo atuma dukumira ibyaha binyuranye ndetse tukanafata abanyabyaha batandukanye. Turifuza ko iyi mikoranire myiza yakomeza.

CIP Gasasira yakomeje agira at,"Kuba uriya mugabo yarafashwe ntibyatunguranye kuko inzego z’umutekano n’abanyerondo bakorana neza n’abaturage. Ibi bituma amakuru yose y’ikintu kinyuranyije n’amategeko ndetse n’ikindi cyahungabanya umutekano n’ituze rya rubanda kimenyekana. Turasaba uwaba agitekereza kunyura inzira nk’izo zibujijwe kubireka kuko azafatwa agashyikirizwa inzego z’ubutabera."

CIP Gasasira yagiriye inama abagifite imyumvire yo kumva ko bakora ibyaha hanyuma bagatanga ruswa kugira ngo bagere ku migambi yabo, kureka uwo muco mubi kuko Polisi, abaturage, inzego z’ibanze n’iz’umutekano ndetse n’izindi bari maso kandi biyemeje gufatanya kurwanya iyo ngeso mbi.

Umuvugizi wa Polisi mu Ntara y’IBurengerazuba yakomeje avuga ko ruswa ari mbi kandi imunga ubukungu bw’igihugu mu buryo bwinshi, akaba yarasabye buri wese gutanga umusanzu we mu gukumira no kurwanya ruswa ndetse n’ibindi byaha."

Ingingo ya 641 yo mu gitabo cy’amategeko ahana ibyaha cy’u Rwanda, igira iti” Umuntu wese uha undi muntu, ku buryo bweruye cyangwa buteruye, washatse kumuha, wamuhaye ku buryo buziguye cyangwa butaziguye, impano cyangwa indonke iyo ari yo yose cyangwa yamugiriye amasezerano yabyo kugira ngo amukorere cyangwa akorere undi muntu ibinyuranyije n’amategeko cyangwa areke gukora ibiri mu nshingano ze, ahanishwa igifungo kirenze imyaka itanu (5) kugeza ku myaka irindwi (7) n’ihazabu y’amafaranga y’u Rwanda yikubye inshuro kuva kuri ebyiri (2) kugeza ku icumi (10) z’agaciro k’indonke yatanze cyangwa yashatse gutanga”.





Tanga igitekerezo kuri iyi nkuru



Igitekerezo