Karahanyuze pe! Ibuka amwe mu mategeko asekeje yagengaga umupira wa karere

Karere ni umupira wabaga ukozwe mu mashashi azirikishije ibirere cyangwa mushipiri. Ubajije benshi mu rubyiruko ndetse na bamwe mu bagabo b’ibikwerere, wasanga abatarakinnye uwo mupira wakinirwaga cyane mu muhanda, ari mbarwa.

Akenshi usanga benshi mu bakinnyi bakomeye mu Rwanda, muri Afurika ndetse no ku isi muri rusange, baba baratangiye bakina Karere bakiri bato, bakaza kugaragaza impano bagashyirwa mu mashuri y’umupira bakavamo abakinnyi bakomeye.

Uwo mukino wa Karere utakigaragara cyane mu Mujyi wa Kigali, wagiraga amabwiriza yawugengaga, ahabanye cyane n’agenga umupira w’amaguru usanzwe.

Dore amwe mu mategeko atangaje yagengaga karere

1. Nyir’umupira ntiyasimburwaga

Kabone niyo yabaga atazi gukina, cyangwa yarushye, nyir’umupira yagombaga gukina umukino wose ntawumusimbuye, kandi umukino warangiraga iwabo bamuhamagaye cyangwa arushye, yabaga anemerewe kugusimbuza iyo wabaga umwimye umupira kobone n’iyo wabaga watsinze igitego.

2. Ikipe nyir’umupira arimo ntiyiyamburaga

Kuko nta myenda isa ababaga bagiye gukina bagiraga ’jersey’, byasabaga ko ikipe imwe yiyambura kugira ngo umwe amenye bagenzi be, ikipe yo nyir’umupira arimo ntabwo yiyamburaga.

3. Imipangirwe y’ikipe

Ntabwo ikipe yapangwaga hakurikijwe aho umuntu ashoboye gukina, ahubwo bitewe n’uko agaragara, umuntu ubyibushye yajyaga mu izamu, ufite imbaraga agakina mu bwugarizi naho nyir’umupira yakundaga gukina nka rutahizamu.

4. Gukinana inkweto

Nk’ibisanzwe abana benshi mu cyaro bakinanaga ibirenge, iyo hari uwazaga yambaye inwketo ashaka kuzikinana nyir’umupira ni we wemezaga niba azikinana cyangwa atazikinana.

5. Penaliti

Ntibyabaga byoroshye kwemeza niba habayeho penaliti cyane ko n’ibibuga nta mirongo yabagamo, akenshi penailiti yamezwaga iyo umukinnyi bamuvunnye akava amaraso, cyangwa akavunika bakamukura mu kibuga bamuteruye.


Iyo nyir’umupira arushye umukino uhita urangira!

6. Gusimbuza

Byari byemewe ko niba umukinnyi iwabo bamuahamgaye agenda agasiga bamusimbuye ariko yagaruka agakomeza mu mwanya we.

7. Kurengura

Iyo umupira wabaga warenze, si itegeko ko umukinnyi yarenguraga n’amaboko abiri yashoboraga gukoresha n’ukuboko kumwe bitewe n’aho ashaka kurengura.

8. Gusimbuza umunyezamu bagiye gutera penailiti, nyuma agasubira mu izamu

Iyo mwabaga mutizeye ko umunyezamu urimo ashoboye gufata penaliti, mwaramusimbuzaga hakajyamo undi nyuma yayo umunyezamu hagasubiramo umunyezamu warurimo.

9. Abasimbura akazi kabo kabaga ari ako gutoragura imipira

Abasimbura, bamwe babaga batabanje mu kibuga nibo babaga bashinzwe gutoragura imipira, imwe yabaga yagiye mu gihuru bakajya kuyizana.

10. Koruneri 3 zavagamo penaliti

Iyo habaga koruneri 3 zikuriranya, ni ukuvuga bagiye gutera karuneri, umupira ugasubirayo, bayitera ukongera ugasubirayo, byahitaga bivamo penaliti.

Aya ni amwe mu mategeko yagengaga umupira wa karere bityo nawe birashoboka ko hari andi wibuka tutanditsemo hano, wayasangiza abandi wandika ahagenewe ibitekerezo.


Karere yabaga ikozwe n’amashashi azirikishijwe mushipiri cyangwa ibirere

@Umubavu.com





Tanga igitekerezo kuri iyi nkuru



Igitekerezo
mwizwa maurice Kuya 5-09-2019

Andika Igitekerezo Hanno hhhhhhh sha nukuri utwibukije ibihe bya kera urumuhanga pe.narimfite ama shida(ibibazo)ariko byibura utumye mwenyura.nako natembagaye.

-xxxx- Kuya 5-09-2019

urakoze rwose kutwibutsa!