Jacques Chirac,wabaye Perezida w’u Bufaransa mu bihe bitandukanye yitabye Imana ku myaka 86.

Inkuru y’urupfu rwe igiye ahagaragara muri iki gitondo cyo kuri uyu wa Kane tariki ya 26 Nzeli 2019, aho yitabye Imana bamwe bo mu muryango we bahari kandi mu mahoro nkuko umukwe we, Frederic Salat-Baroux yabitangarije AFP.

Jacques Chirac wayoboye igihugu cy’u Bufaransa muri Manda ebyiri hagati ya 1995 na 2007, yafashije iki gihugu kwinjira mu muryango w’ibihugu by’i Burayi by’umwihariko mu gukoresha ifaranga rimwe rizwi nka ’EURO’.

Kimwe mu byemezo bye bikakaye mu rugendo rwe rwa Politiki azahora yibukirwaho, ni ukugabanya imyaka umukuru w’igihugu amara ku butegetsi aho ku bwe yavuye ku myaka irindwi ikagirwa itanu.

Ni umwe kandi mu Baperezida bashize amanga bakereka Leta Zunze Ubumwe za Amerika ko atabashyigikiye mu bikorwa byose bakoraga mu gihugu cya Iraki birimo kugabayo ibitero.

Nubwo yakoze ibi byose kandi uyu mugabo ubutegetsi bwe bwaranzwe na ruswa cyane.

Uburwayi yigeze kugira mu 2005 ubwo yari Perezida bwamuciye intege bituma atangira kugaragara mu ruhame inshuro nke muri iki gihe.

Mu Ukuboza 2015, yamaze ibyumweru bibiri mu bitaro arwaye ibyo umuryango we wise umunaniro.

@Umubavu.com

---

---