Igisirikare cya Repubulika Iharanira Demokarasi ya Kongo, FARDC (Forces Armées de la République Démocratique du Congo, FARDC) cyatangaje ko ku wa Gatandatu w’icyumweru gishize cyatahukanye inyeshamba z’u Rwanda 71 ziheruka gufatwa mu rugamba rukomeje rwo kurwanya imitwe y’inyeshamba muri icyo gihugu, aba bakaba bakurikiye abandi baheruka gushyikirizwa u Rwanda na bo bafashwe mpiri na FARDC.

Umuvugizi wa FARDC by’umwihari w’ingabo ziri muri urwo rugamba, Kapiteni Dieudonné Kasereka yabwiye BBC ko abo barwanyi ari abo mu mutwe wa Conseil National Pour la Renaissance et la Démocratie (CNRD).

CNRD ni umutwe wiyomoye kuri Forces Démocratiques pour la Libération du Rwanda (FDLR) ukorera mu Burasirazuba bwa Republika Iharanira Demokarasi ya Congo.

Urugamba rwo kurwanya imitwe yitwaje intwaro mu Karere ka Kalehe rwatangiye ku wa 26 z’ukwezi kwa 11 mu Karere ka Kalehe.

Mu kiganiro yahaye BBC, Kapiteni Kasereka avuga ko abo barwanyi bashikirijwe igisirikare c’u Rwanda bari kumwe n’abandi 1471 bagizwe n’imiryango yabo.

Atangaza ko izo nyeshamba n’imiryango yabo bakiriwe na Koloneli Patrick Musho ku ruhande rw’u Rwanda.

Avuga ko intambara zigikomeje mu Karere ka Mwenga, aho abo barwanyi ba CNRD bari bageze ubwo barimo berekeza mu Karere ka Fizi.

Atangaza ko mu ntambara z’ejo ku Cyumweru tariki ya 22 Ukuboza 2019 mu gace ka Kasika zahuje abasirikare ba Congo n’izo nyeshamba, zibarirwa mu ijana zanze gushyira intwaro hasi, bashoboye kwica umunyamabanga mukuru wa CNRD, bongera bafata mpiri n’abarwanyi bagera ku icumi.

Ku wa 16 z’uku kwezi, umutwe wa mbere ugizwe n’inyeshamba 291 zari kumwe n’abana 11 bashyikirijwe u Rwanda nyuma y’aho batsindiwe n’igisirikare cya Congo mu Ntara ya Kivu y’Amajyepfo.

Kapiteni Kasereka avuga ko uwo mutwe w’abo batahukanywe ku wa Gatandatu, ugizwe n’abaheruka gufatwa no kwishyikiriza FARRDC, baka bari bacungiwe mu nkambi ya gisirikare ya Nyamunyunyi iri ku birometero 30 uvuye i Bukavu, umurwa mukuru wa Kivu y’Amajyepfo.

Ku wa 08 z’uku kwezi k’Ukuboza, igisirikare cya Congo cyari cyatangaje ko abantu 1200 b’umutwe CNRD bagizwe n’abarwanyi n’imiryango yabo muri iyo ntara bishyikirije igisirikare cya FARDC.

Mu Burasirazuba bwa Congo, habarurwa imitwe y’inyeshamba igera ku 133, imwe igizwe n’abanyekongo iyindi igizwe n’abanyamahanga, muri iyo 35 irwanira muri Kivu y’Amajyepfo, nk’uko bivugwa na Kapiteni Kasereka.

Avuga ko igisirikare cya Congo kitarota gihagarika ibitero ku mitwe y’inyeshamba irwanira muri ako Karere kugeza yemeye gushyira intwaro hasi.

Kuva mu kwezi kwa cumi, FARDC iri mu rugamba rwo kurwanya imitwe y’inyeshamba irangwa mu Burasirazuba bwa RDC

Pastor Stephen (Etienne) waje avuye USA yasabye anakwa undi mugore nyuma yo guhemukirwa n’uwa mbere :

---

---