Inzego za Uganda n’u Burundi mu rubanza rwa ’Sankara’

Urubanza ruregwamo Nsabimana Callixte uzwi nka ’Sankara’ wari umuvugizi w’inyeshyamba za FLN zirwanya leta y’u Rwanda rwakomeje kuri uyu wa Kabiri ubushinjacyaha butanga ibimenyetso ku byaba 17 bumurega.

Ubushinjacyaha bumushinja gukorana n’inzego z’umutekano z’ibihugu by’u Burundi na Uganda mu gutegura ibikorwa byo gutera u Rwanda.

Ubushinjacyaha bwatangiye buvuga ko igihe uregwa yabajijwe n’ubusihnjacyaha agifatwa ndetse no mu rubanza rw’ifungwa n’ifungurwa ry’agateganyo uregwa yemeye ibyaha byose aregwa anabisabira imbabazi.

Muri uru rubanza ruri kuburanishirizwa mu rukiko rw’imanza z’iterabwoba ruri i Nyanza mu majyepfo y’u Rwanda uregwa ntabwo arahabwa umwanya.

Uyu munsi ubushinjacyaha bwavuze ko ibyaha bye bishingiye ku kuba yari mu buyobozi bw’inyeshyamba za FLN n’impuzamashyaka ya MRCD irwanya ubutegetsi bw’u Rwanda.

Ko yasinyaga amatangazo ya FLN avuga ko izi nyeshyamba zikambitse i Nyabimata mu majyepfo ashyira uburengerazuba bw’u Rwanda mu buryo bwo gutera ubwoba abaturage ko hari ibice by’igihugu bafashe.

Yashinjwe kandi kwigamba ibitero by’umutwe wa FLN byahitanye abantu mu murenge wa Nyabimata mu karere ka Nyaruguru ndetse n’ibyakorewe mu karere ka Nyamagabe.

Ubushinjacyaha bwagaragaje ubuhamya bwa Me Yusuf Ndutiye uri mu baregera indishyi, ubu bamaze kuba barindwi muri uru rubanza.

Ubushinjacyaha buvuga ko Me Ndutiye yarokotse igitero cya FLN cyagabwe ku muhanda uca mu ishyamba rya Nyungwe imodoka ye igatwikwa.

Ubushinjacyaha buvuga ko Me Ndutiye yasohowe mu modoka akabona n’abandi baturage benshi bavanywe mu modoka bagashyirwa munsi y’umuhanda ndetse n’abafashwe bugwate.

Avuga kandi ko hapfuye abantu benshi n’inkomere nyinshi n’imodoka zigatwikwa mbere y’uko ingabo z’igihugu zitabara.

Ibi bitero byabaye mu 2018 ubushinjacyaha buvuga ko byose Bwana Nsabimana Callixte ubwo yabyigambye.

Ubushinjacyaha kandi buvuga ko Nsabimana ubwe yiyemereye ko yagiranye imishyikirano n’ukuriye iperereza ryo hanze mu Burundi.

Buvuga ko uwo yemereye abarwanyi ba FLN kugaba ibitero ku Rwanda bavuye muri Congo banyuze ku butaka bw u Burundi.

Nsabimana kandi asihnjwa ko yanabonanye n’ukuriye iperereza rya gisirikare muri Uganda ngo wamwemereye gufasha abarwanyi b’umutwe yari abereye umuvugizi.

Ubushinjacyaha kandi buramushinja gushakira inkunga y’amafaranga no kwinjiza abarwanyi mu mutwe wa FLN.

Nyuma yo kumva ubushinjacyaha burega Nsabimana harakurikiraho kumva kumva uregwa.

Nsabimana Callixte uzwi nka ’Sankara’ wari umuvugizi w’inyeshyamba za FLN zirwanya Leta y’u Rwanda, aregwa ibyaha 17 irimo icyo kurema umutwe w’ingabo utemewe, iterabwoba no gukorana n’igihugu cy’amahanga hagamijwe gushoza intambara ku Rwanda.

Irebere na Video utapfa gusanga ahandi hose: Umugore wa Barafinda yariye karungu byose abishyira hanze:





Tanga igitekerezo kuri iyi nkuru



Igitekerezo