Inama y’abaminisitiri yateranye mu buryo bwihariye kubera ibiza bimaze guhitana ubuzima bw’abatari bake

Nyuma yaho ibiza bimaze guhitana ubuzima bw’abaturage barenga 116 mu gihe cy’amezi ane, kuri uyu wa Gatatu tariki ya 02 Gicurasi 2018, Inama y’Abaminisitiri yateraniye muri Village Urugwiro, iyobowe na Nyakubahwa Perezida wa Repubulika y’u Rwanda, Paul KAGAME mu buryo bw’umwihariko yiga kuri iki kibazo hagamijwe kurebera hamwe icyakorwa ngo ibi biza bikumirwe.

Inama y’Abaminisitiri yateranye ku buryo bw’umwihariko igamije gusuzuma ikibazo cy’ibiza bimaze iminsi byibasiye Abanyarwanda, bitwara ubuzima bwa bamwe ndetse byangiza n’imitungo myinshi.

Inama y’Abaminisitiri yihanganishije Abanyarwanda bose, by’umwihariko imiryango yabuze ababo hamwe n’abandi bose bagizweho ingaruka n’ibiza byatewe n’imvura nyinshi.

Inama y’Abaminisitiri yemeje ingamba n’uburyo byo gukomeza gufasha abibasiwe n’ibiza ndetse no gukomeza gusana mu buryo bwihuse ibyangiritse.

Inama y’Abaminisitiri yemeje kongera imbaraga mu guhangana no gukumira ibiza, kurwanya ingaruka zabyo mu gihe kirambye, hibandwa ku kubungabunga ibidukikije, ibikorwaremezo, imiturire myiza, ubuhinzi n’ubworozi.

Iri tangazo ryashyizweho umukono na Marie Solange KAYISIRE

Minisitiri ushinzwe Imirimo y’Inama y’Abaminisitiri





Tanga igitekerezo kuri iyi nkuru



Igitekerezo