Impunzi z’Abarundi zanze kurya bimwe mu biribwa byo mu nganda zakirijwe kubera imyemerere yazo

Nyuma yuko impunzi z’Abarundi zinjiye ku butaka bw’u Rwanda zivuye muri Repubulika Iharanira Demokarasi ya Congo kuri uyu wa Gatatu, zanze kurya ibiribwa byo mu nganda zahawe zikigera mu gihugu zivuga ko imyemerere yazo itabyemera nkuko ubuyobozi bw’Akarere ka Rusizi bwabitangaje.

Izi mpunzi zinjiye mu Rwanda ku gicamunsi cyo kuri uyu wa Gatatu, zinjiriye ku mupaka wa Kamanyola zihingukira mu Murenge wa Bugarama.

Izi mpunzi zikimara kugera mu Rwanda zatangaje ko impamvu yaziteye kongera guhunga ari impungenge z’umutekano kuko zari zifite amakuru y’uko zishobora kugabwaho igitero ndetse Leta ya Congo yari yaranze kubaha uburenganzira bwo gutura ku butaka bwayo nk’impunzi.

Kuri uyu wa Kane zimuwe aho zari zakiriwe zijyanwa mu nkambi ya Nyarushishi iherereye mu Murenge wa Nkungu mu gihe MIDIMAR na HCR bigishakisha uko bajyanwa mu zindi nkambi.

Hagati aho ariko ngo zifite imyemerere igoye yo kutarya ibiribwa byose byaciye mu ruganda ari na yo mpamvu zanze ibyo zaraye zihawe birimo Biscuits.

Umwe muri zo waganiriye na TV1 yagize ati “ Bya biribwa byose biba byakorewe mu nganda; bya bindi babika mu bikarito tudafite ubuhanga bwo guhita tubipima ntidushobora kubirya; tuzarya ibiryo bimeze neza nk’ibijumba, ibishyimbo, amateke; ni bene ibyo biryo tuzarya kandi bizatubeshaho.”

PNG - 824.6 kb
Impunzi z’Abarundi zinjiye ku butaka bw’u Rwanda zivuye muri Repubulika Iharanira Demokarasi ya Congo kuri uyu wa Gatatu zivuga ko zitarya ibiribwa byakorewe mu nganda nka Bisuits ziri muri bimwe zakirijwe kubera imyemerere yazo


Umuyobozi w’Akarere ka Rusizi, Harerimana Frederic yatangaje ko nyuma yo kugera mu nkambi bazagirana ibiganiro n’ubuyobozi bwabo ku myitwarire irimo kwanga ibiribwa no kwanga kuvurwa n’umuganga uwo ari we wese.

Yagize ati “Twabonye ibitugaragariza ko ibyo tubafungurira batari kubyakira. Nka biscuits twazitanze tuzi ko bajya kuzifungura ariko twasanze aho bazirunze zose uko twazitanze.”

Yakomeje agira ati “ Ikigaragara ni uko mu myemerere yabo hari ibyo batarya biteye kwibaza impamvu yabyo ariko batubwiye ko ari ko bemera kandi twabijeje ko tuzaganira kuri iyo myitwarire kuko ntabwo bikwiye ko dutanga amafaranga dushakisha ibyo twakiriza abantu abo tugiye kwakira bakabyanga. Ariko turaza kubiganiraho n’abayobozi babo nibagera mu nkambi.”

Nyuma y’ibarura ryakozwe byagaragaye ko izi mpunzi zose zigera ku 2579 ziganjemo abakiri bato. Bamwe muri zo bambukanye amatungo yabo arimo inka n’ihene.

Usibye biscuits banze kurya n’ifu ya kawunga bahawe ngo babanzaga gushishoza niba ari iyakorewe mu Rwanda mbere yo kugira icyo bayikoresha.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
Esperance Kuya 10-03-2018

Hhhhhhhhhh birababaje. Abo bantu se Imana ibasange. Ibafashe guhindura imyumvire.