Caronavirus ishobora kuba icyorezo mpuzamahanga-OMS

Ishami ry’Umuryango w’Abibumbye ryita ku buzima (OMS/WHO) ryatangaje ko isi ikwiye kwitegura ko Coronavirus ishobora kuba icyorezo mpuzamahanga.

OMS yavuze ko hakiri kare cyane ko Coronavirus yitwa icyorezo cyugarije isi ariko ko ibihugu bikwiye kuba “mu cyiciro cyo kwitegura”.

Icyorezo ni igihe indwara yandura ikwirakwiriye mu buryo bworoshye iva ku muntu umwe ijya ku wundi mu bice byinshi by’isi.

Abandi bantu bashya banduye iyo virusi, itera indwara yo mu myanya y’ubuhumekero izwi ku izina rya Covid-19, bakomeje kugaragara, ndetse abari kugaragara muri Koreya y’Epfo, u Butaliyani na Iran bakaba bari gutera impungenge.

Ariko benshi mu bamaze kuyandura ni abo mu Bushinwa, aho ubu bwoko bushya bwa coronavirus bwagaragaye bwa mbere mu mwaka ushize, hakaba hari abantu barenga 77,000 bayirwaye naho abarenga 2,600 ikaba imaze kubica.

Abantu barenga 1,200 bamaze kwemezwa ko bayirwaye mu bindi bihugu bigera hafi kuri 30 ndetse abantu 20 imaze kubahitana.

Ejo ku wa Mbere, u Butaliyani bwatangaje ko abantu bane bandi yabahitanye, bituma umubare w’abo imaze kwica kugeza ubu muri icyo gihugu ugera kuri barindwi.

Amasoko y’imari n’imigabane yo ku isi yagiye ku kigero cyo hasi cyane kubera impungenge z’ingaruka ku bukungu z’iyo virusi.

U Bushinwa bwavuze ko buzasubika inama ngaruka mwaka y’inteko yari iteganyijwe kuba mu kwezi gutaha kwa Gatatu, “mu gukomeza ibikorwa” byo kurwanya Coronavirus.

Urwo rwego, rwemeza ibyemezo byafashwe n’ishyaka rya gikomunisti riri kubutegetsi, ubundi ruterana buri mwaka kuva mu mwaka wa 1978.

Ikigero cy’abarwayi bayirwaye bari gupfa kubera iyo ndwara izwi nka Covid-19 kigaragara nk’ikiri hagati ya 1% na 2%, nubwo OMS iburira ko ikigero cy’abo yica kitaramenyekana.

Ejo ku wa Mbere, Iraq, Afghanistan, Kuwait, Oman na Bahrain byatangaje abantu ba mbere byemeje ko bayirwaye, bose bahageze bavuye muri Iran.

Abategetsi bo muri Bahrain bavuze ko umurwayi wayanduye waho ari umushoferi wa bisi itwara abanyeshuri, kandi ko amashuri menshi yafunzwe kubera iyo mpamvu.

Ingaruka zikomeje guterwa n’iki cyorezo mu buryo butandukanye

Imwe mu mikino yo mu gihe kiri imbere muri shampiyona y’umupira w’amaguru mu cyiciro cya mbere mu Butaliyani, Serie A, ndetse n’iyo mu irushanwa rya Europa League izakinwa nta bafana bari ku kibuga mu kwirinda ikwirakwira ry’iyo virusi, nkuko byatangajwe na Minisitiri w’Imikino w’u Butaliyani.

Koreya ya ruguru yashyize mu kato abanyamahanga 380 mu rwego rwo gukumira Coronavirus.

Mu kiganiro n’abanyamakuru ku munsi w’ejo ku wa Mbere, Tedros Adhanom Ghebreyesus, umukuru wa OMS, yavuze ko umubare w’abantu bashya banduye coronavirus mu minsi ishize muri Iran, u Butaliyani na Koreya y’Epfo “uteye impungenge mu buryo bukomeye”.

Ariko yongeyeho ati “Kuri ubu, ntabwo turi kubona gukwirakwira mu buryo budakumiriwe kw’iyi virusi kandi ntituri kubona indwara ikaze ifata abantu ahantu hagari cyangwa impfu [z’ahantu hagari]”.

“Iyi virusi yaba ifite ubushobozi bwo guhinduka icyorezo? Cyane rwose, irabufite. Twageze kuri urwo rwego? Mu isesengura ryacu dusanga tutararugeraho”.
“Ubutumwa bw’ingenzi bukwiye guha ibihugu byose icyizere, umuhate no kumva ko ibintu bishoboka, ni uko iyi virusi ishobora guhagarikwa, kandi mu by’ukuri hari ibihugu byinshi byabishoboye”.

“Gukoresha ijambo ‘icyorezo’ ubu ngubu ntabwo bihuye n’ibyo turi kubona, ariko birumvikana ko rishobora gutera ubwoba”.

Ariko Mike Ryan, ukuriye gahunda y’ubutabazi bwihuse muri OMS, yavuze ko ubu ari igihe cyo “gukora buri kintu cyose wakora mu kwitegura icyorezo”.


Ba mukerarugendo bambaye ibyo kubapfuka ubwo basuraga agace ka Piazza San Marco mu mujyi wa Venice mu majyaruguru y’u Butaliyani ku munsi w’ejo ku wa Mbere

Byari amarira n’agahinda gusa mu gusezera kuri Kizito Mihigo mu rugo rw’umubyeyi we, Diane Rwigara yararuciye ararumira amaze kumusezeraho:





Tanga igitekerezo kuri iyi nkuru



Igitekerezo