Ikibazo cy’abimukira cyatumye Minisitiri w’umutekano w’u Bwongereza yegura ku mirimo ye

Ku Cyumweru tariki ya 29 Mata 2018, uwari Minisitiri w’Umutekano w’u Bwongereza, Amber Rudd yasezeye ku mirimo ye, nyuma y’uko ahaye Inteko Ishinga Amategeko amakuru y’ibinyoma ku birebana no kwirukanwa mu gihugu kw’abimukira.

Mu Cyumweru gishize nibwo Komisiyo ishinzwe umutekano mu Nteko yahamagaje Rudd imuhata ibibazo ku birebana no gukuraho igihe ntarengwa cyo gusubiza iwabo abimukira bo mu birwa bya Caraïbes, bageze mu Bwongereza nyuma y’intambara ya kabiri y’Isi.

Nubwo Rudd yabwiye iyi komisiyo ko nta makuru kubirebana no kwirukanwa kw’aba bimukira bazwi nka ‘Windrush generation’, ku cyumweru ikinyamakuru The Guardian cyasohoye hanze inyandiko we ubwe yashyize hanze avuga bamaze gushyiraho igihe ntarengwa.

Mu ibaruwa isezera yanditse CNN yabashije kubonera kopi, Rudd yavuze ko afashe umwanzuro wo kwegura nyuma yo gusuzuma inama yagiriwe kuri iki kibazo, ndetse akamenya ko hari amakuru yahawe ibiro bye ariko agakora ikosa ryo kutayamenya.

Minisitiri w’Intebe w’u Bwongereza, Theresa May, wakiriye iyegura rya Rudd, yavuze ko bitamushimishije ariko aha agaciro impamvu zatumye afata uyu mwanzuro.

Mu minsi ishize nibwo u Bwongereza bwatangaje ko Minisiteri y’Umutekano yangije inyandiko zihabwa abimukira z’abaturutse mu birwa bya Caraïbes byahoze bikolonizwa n’Abongereza, bituma bamwe batakaza uburenganzira bwo gukomeza kuba muri iki gihugu.

May wanabaye Minisitiri w’Umutekano kuva mu 2010 kugera mu 2016 yasabye imbabazi abayobozi b’ibihugu bariya bimukira bakomokamo, dore ko iki kibazo cyanabaye ari muri uyu mwanya.

Nubwo Rudd nawe yasabye imbabazi ndetse akavuga ko hazakorwa ibishoboka aba bimukira bazwi nka ‘Windrush generation’ bakabona ubwenegihugu, ikosa ryashyizwe kuri May, aho Umuyobozi w’ishyaka ry’abakozi, Tom Watson yavuze ko yamubereye igitambo kandi byose byabaye mu gihe ariwe wayoboraga iyi minisiteri.

Kwegura kwa Rudd wabaye Minisitiri w’Umutekano muri Nyakanga 2016, bishobora gutuma guverinoma ya May ukomeje guhangana na ‘Brexit’, ndetse no kutagira abamushyigikiye benshi mu Nteko Ishinga Amategeko, irushaho gucika intege.

PNG - 525.7 kb
Amber Rudd wari Minisitiri w’Umutekano yeguye kubera guha Inteko Ishinga Amategeko amakuru ku kwirukanwa kw’abimukira baturutse mu bihugu byahoze bikolonizwa n’u Bwongereza

@Umubavu.com





Tanga igitekerezo kuri iyi nkuru



Igitekerezo