Igihugu cya Zimbabwe cyemeje ikoreshwa ry’urumogi

Igihugu cya Zimbabwe kibaye icya kabiri ku mugabane wa Afrika cyemeje ikoresha ry’urumogi mu buryo bw’ubuvuzi n’ubushakashatsi butandukanye.

Mu itangazo ryasohowe na Minisitiri w’Ubuzima, Dr David Parirenyatwa, yavuze ko abantu ku giti cyabo ndetse n’abafite ibyashara bifuza gutera urumogi rwakoreshwa mu bijyanye n’ubuvuzi bw’abantu cyangwa mu bundi bushakashatsi, bemerewe kuzajya bakoresha urumogi bagasabwa gusa kuzajya basaba impushya zibibemerera.

Urwo ruhushya rw’igihe kingana n’imyaka itanu ngo ruzafasha abazajya baruhinga, gutwara no kugurisha urwo rumogi, amavuta yarwo cyangwa urumogi rwumye.

Guhinga cyangwa gufatanwa urumogi rusanzwe ruzwi ku izina ‘Mbanje’ cyangwa ‘Dagga’ by’umwihariko muri Afurika y’Epfo, bihanishwa igifungo cy’imyaka 12.

Gutumura (kunywa) urumogi nk’itabi byo biracyabujijwe.

Abemerewe gusaba impushya ni Abanya-Zimbabwe cyangwa abafite impushya zo kuba muri Zimbabwe, cyangwa ababonye uruhushya rwa Minisitiri.

Abigeze gukurikiranwa ku byaha byerekeye urumogi bo ntibemerewe gusaba izo mpushya.

Igihugu cya Lesotho nicyo cyabaye icya mbere gutanga uburenganzira ku ikoreshwa ry’urumogi mu bijyanye n’ubuvuzi mu mwaka ushize.

Igihugu cya Zimbabwe gisanzwe kiri mu bihugu bya mbere muri Afrika y’Amagepfo bihinga itabi, kigurishiriza ahanini mu Bushinwa.

Umugabane wa Afurika niwo ukurikira Amerika mu guhinga urumogi no mu kurukoresha, mu cyegeranyo cya ONU cyo mu mwaka wa 2017 nkuko BBC yanditse iyi nkuru ibitangaza.

PNG - 938.1 kb
Ikoreshwa ry’urumogi mu buvuzi bw’abakera byasaga n’ubundi nk’ibyari bisanzwe byemewe muri Zimbabwe

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo