Icyo Amb. Nduhungirehe yavuze ku rupfu rwa Mudacumura wayoboraga FDLR

Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe, yashimiye ingabo za Repubulika Iharanira Demokarasi ya Congo, FARDC, ku bw’igitero zagabye ku nyeshyamba zayoborwaga na Lt Gen Sylvestre Mudacumura ndetse akahasiga ubuzima.

Abinyujije kuri Twitter, Ambasaderi Nduhungirehe yavuze ko icyo gitero cyahitanye Mudacumura na bamwe mu barwanyi be ari igikorwa cyiza kigaragaza ubushake bwa Perezida Félix Tshisekedi bwo kurandura imitwe y’iterabwoba nka FDLR na RNC n’indi mitwe itandukanye ikorera muri icyo gihugu harimo n’iy’abagize uruhare muri Jenoside yakorewe Abatutsi mu Rwanda.

Ambasaderi Nduhungirehe kandi, yagaragaje urutonde rwa bamwe mu bagerageje kurwanya Leta y’u Rwanda ariko ntibyabahira barimo LaForge Fils Bazeye (FDLR), Théophile Abega (FDLR), Callixte Nsabimana (FLN), Capt Sibomana Charles (RNC), Maj Habibu Madathiru (RNC) na Lt Gen Sylvestre Mudacumura (FDLR), aca amarenga ko n’abandi bitazabagwa amahoro.


Ambasaderi Nduhungirehe kuri Twitter ye

Ubuyobozi bw’ingabo muri Repubulika ya Demokarasi ya Congo bwatangaje ko abasirikare ba Congo barwanira muri Kivu y’Amajyaruguru ari bo bivuganye Sylvestre Mudacumura.

Yishwe mu ijoro rishyira kuri uyu wa gatatu, yicirwa mu gace ka Bwito muri Rutshuru, yicanwa na bamwe mu basirikari bafatanyaga kuyobora FDLR.

Umuvugizi w’ingabo za Congo (FARDC) General Richard Kasonga, yavuze ko guhagarika ibikorwa bya Sylvestre Mudacumura ari igikorwa gikomeye izo ngabo zagezeho kuko yari ayoboye umutwe w’inyeshyamba za FDLR zanze gutaha mu Rwanda ku bushake.

Yongeyeho ko urupfu rwe rutanga ubutumwa bukomeye ku yindi mitwe y’inyeshyamba ikorera muri icyo gihugu.


Ambasaderi Nduhungirehe yashimye ingabo za DR Congo zivuganye Sylvestre Mudacumura

@Umubavu.com





Tanga igitekerezo kuri iyi nkuru



Igitekerezo
MATH Kuya 19-09-2019

FRED GISA RWIGEMA; BUNYENYEZI;BAYINGANA;BYARUHANGA BAPFA NTIWARI UNAHARI WARI UMWANA UBWO SE URUGAMBA RWARAHAGAZE? GAKE CUNGA