Ibyiciro by’Ubudehe bikunze kuvugisha benshi bigiye kuvugururwa

Ibyiciro by’Ubudehe byagiye bivugwamo ruswa n’akarengane bigiye kuvugururwa, kuri ubu hakaba haratangiye gukusanywa ibitekerezo bizashingirwaho mu kubinoza neza ndetse no kwirinda n’andi makosa yose yagaragara nk’ayagaragajwe mu bigenderwaho ubu byo mu 2016/2017.

Abaturage ndetse na Sosiyete Sivile Nyarwanda ntibahwemye kugaragaza ko ibyiciro by’ubudehe byifashishwa mu igenamigambi mu nzego zitandukanye za leta, hari aho bitakozwe neza ndetse rimwe na rimwe abayobozi b’inzego z’ibanze bagasaba ruswa abaturage kugira ngo babashyire mu cyiciro cy’abahabwa ubufasha na Leta.

Kuri uyu wa 14 Gashyantare 2019, Minisiteri y’Ubutegetsi bw’Igihugu n’izindi nzego, bunguranye ibitekerezo hagamijwe gukusanya ibizagenderwaho mu gushyiraho ibyiciro bishya by’ubudehe.

Umunyamabanga Nshingwabikorwa wa Transparency International Rwanda, Mupiganyi Apollinaire, yagaragaje ibinengwa mu byiciro biriho ubu.

Ati “Gukomatanya ubudehe n’izindi serivisi bituma babandi bafite amikoro bashaka kujya mu byiciro bifashwa kugira ngo babone izo serivisi, biragaragaramo ruswa n’akarengane, gukorera mu mucyo biri hasi kuko umukuru w’umudugudu niwe ufata icyemezo cy’ukwiye kujya mu cyiciro runaka.”

Minisitiri w’Ubutegetsi bw’Igihugu, Prof. Shyaka Anastase, yavuze ko ibyiciro bishya bizashingira ku bitekerezo by’abanyarwanda.

Ati “Utarabona ikibazo, biragoye ko wagishakira igisubizo kirambye […] Turifuza ko muri uku kwezi kwa kabiri wenda n’iminsi micye y’ukwa gatatu tuba tumaze kubona ishusho y’ibyo abanyarwanda bifuza kugira ngo tubyegeranye tuzakore politike y’iki gikorwa dushingiye ku bitekerezo biturutse mu banyarwanda b’ingeri zitandukanye.”

Minisitiri Shyaka yakomeje avuga ko abanyarwanda bakwiye guhindura imyumvire kuko ikigamijwe ari ugushyiraho ibyiciro bikora kandi bitanga ibisubizo bigabanya ubukene mu buryo bufatika.

Ati “Nyuma y’iyi nama turifuza ko twamanuka tukegera abanyarwanda bakaduha ibitekerezo, ibyiciro byakora ni ibihe, ese twashingira kuki? iyo abantu bari mu cyiciro cy’ubukene ntabwo bakijyamo kugira ngo bakiraremo, bagishakiremo, bakibyariremo buzukururizemo, ni ukugira ngo biduhe ishusho y’uburyo twabafasha bashobore kuzamuka.”

Mu mvugo ya Minisitiri w’Ubutegetsi bw’Igihugu, humvikanamo ko ibyiciro bishya by’ubudehe bizabamo impinduka zigamije gushishikariza abaturage kwigira no kugira ibakwe ryo kwiteza imbere, ufite intege nke agaterwa ingabo mu bitugu.

Ati “Nubwo hari ubufasha Leta izatanga, nta gisimbura ko umunyarwanda akwiye kubaho yifashije agafasha n’umuryango we. Abantu bose bafite imbaraga nibakore bitunge batunge imiryango yabo”.

Inyito z’ibyiciro by’ubudehe zishobora kuzahinduka

Prof. Shyaka yavuze ko amazina atariyo kamara ahubwo ngo hazabaho ibyiciro by’abantu bishoboye, ibyiciro by’abantu bafite intege nke, ariko kandi ngo haracyakusanwa ibitekerezo ku buryo bizashyirwaho hashingiwe ku bipimo bifatika.

Uko ibyiciro byari biteye

Mu cyiciro cya mbere harimo ingo 376,192 zigizwe n’abantu 1,480,167. Ni ukuvuga ko ari 16% by’Abanyarwanda bose.

Icyiciro cya kabiri cy’Ubudehe kirimo ingo 703,461 zigizwe n’abantu 3,077,816 bangana na 29.8% by’Abanyarwanda bose.

Icyiciro cya gatatu cy’Ubudehe cyo kirimo ingo 1,267,171 zituwe n’Abanyarwanda 5,766,506 bangana na 53.7% by’Abanyarwanda bose, mu gihe icya Kane kirimo ingo 11,664 zituwe n’Abanyarwanda 58,069, bahagarariye 0.5% by’abatuye igihugu cyose.

Imibare igaragaza ko mu Mujyi wa Kigali ariho hari abantu benshi bifashije kuko 57.6% by’abari mu cyiciro cya kane niho babarizwa.

Ibyiciro by’ubudehe bivugururwa buri myaka itatu kugira ngo harebwe aho umuturage yavuye n’aho ageze mu kwiteza imbere. Ni ku nshuro ya gatatu bigiye kuvugururwa, kuko byatangiye mu mwaka wa mwaka wa 2011.

PNG - 645.6 kb
Minisitiri w’Ubutegetsi bw’Igihugu, Prof Shyaka Anastase, avuga ko ibyiciro by’Ubudehe bizakorwa hitawe ku guhindura imibereho y’abanyarwanda
PNG - 1.3 Mb
Abitabiriye iyi nama bunguranye ibitekerezo ku byakorwa ngo ibyiciro by’Ubudehe bibe binoze

@Umubavu.com





Tanga igitekerezo kuri iyi nkuru



Igitekerezo
HAGABIMANA Jean Baptiste Kuya 20-02-2019

Ni byiza ko ibyiciro bishya by’ubudehe byazashyirwaho habayeho kumanuka kwa team runaka urugo ku urundi. Aha bizagora umuturage kuba yatanga amakuru ahabanye nuko ari cyane cyane ko ya team ibyinshi ku imibereho y’ingo izagenda ibyibonera, murakoze igitekerezo cyange cyari iki.

Kayiranga Kuya 18-02-2019

Muzabivaneho, buried were yimenye nibyo bizatuma abantu bavuduka mu iterambere kdi amafarangabashyirwa muri VUP/DS ni menshi cyane muzayakureho mubanze mukemure ikibazo cyibikorwa remezo (amashuri, imihanda no gukwirakwiza amazi)