Ibiganiro  hagati  ya Minisitiri: Umubano w’u Rwanda n’u Burundi  bite

Ba Minisitiri b’Ububanyi n’Amahanga n’Ubutwererane b’u Rwanda n’u Burundi, Dr Vincent Biruta na Ambasaderi Albert Shingiro bagiranye ibiganiro byibanze ku ntambwe imaze guterwa mu kuzahura umubano w’ibihugu byombi umaze igihe urimo igitotsi.

Aba bayoboye Dipolomasi y’u Rwanda n’iy’u Burundi bari mu Nteko Rusange y’Umuryango w’Abibumbye i New York muri Leta Zunze Ubumwe za America, bahuye kuri uyu wa Gatatu tariki 22 Nzeri 2021.

Kuri Twitter za Minisiteri z’Ibihugu byombi, hatambukijweho ubutumwa bugaragaza ko Minisitiri Dr Vincent Biruta na mugenzi we Ambasaderi Albert Shingiro w’u Burundi bahuye bakaganira ku birebana no gushyira mu buryo umubano w’ibi bihugu by’ibituranyi.

Umubano w’u Rwanda n’u Burundi umaze imyaka itandatu urimo igitotsi aho ibihugu byombi byagiye bishinjanya kubangamirana dore ko mu mashyamba yo mu Burundi hari abarwanyi b’imitwe ihungabanya umutekano w’u Rwanda.

Bamwe mu bafatiwe muri iyi mitwe ubu bari imbere y’ubutabera bw’u Rwanda baniyemereye ko bagiye bahabwa ubufasha n’igisirikare cy’u Burundi.

Gusa hamaze iminsi hagaragara ubushake bwo gusubiza mu buryo uyu mubano aho u Rwanda runaherutse gushyikiriza u Burundi bamwe mu bafatiwe ku butaka bwarwo bari mu mitwe ihungabanya umutekano w’u Burundi.

Perezida Kagame Paul mu kiganiro aherutse kugirana n’Ikigo cy’Igihugu cy’Itangazamakuru RBA yatangaje ko ibihugu byombi bifite ubushake bwo gukemura ibibazo ndetse ko hari bamwe mu bagize Guverinoma ku mpande z’ibihugu byombi bagiye bahura bakaganira.





Tanga igitekerezo kuri iyi nkuru



Igitekerezo