Huye: Utugari 14 ntitugira ba Gitifu, hari n’akamaze imyaka 6 yose

Mu Karere ka Huye hagaragara utugari 14 tutagira Abanyamabanga Nshingwabikorwa n’utundi dutandatu tutagira abakozi bashinzwe iterambere (SEDO), ku buryo abaturage badutuyemo batabasha kubona serivise zo kuri urwo rwego uko bikwiye bitewe n’uko akenshi ibiro biba bifunze.

Ni ikibazo bamwe mu baturage bo mu Karere ka Huye basaba ko cyashakirwa igisubizo kuko kimaze igihe kirekire kibabangamiye.

Muri utwo tugari uko ari 14 tutagira Abanyamabanga Nshingwabikorwa harimo kamwe ka Cyarwa ko mu Murenge wa Tumba kamaze imyaka itandatu katamugira.

Bamwe mu baturage batuye muri ako Kagari bavuga ko akenshi babura serivise bitewe n’uko iyo bahageze basanga hafunze.

Umwe yagize ati “Bimaze igihe kinini kuko hakora umukozi umwe, iyo adahari nta serivise tubasha kubona. Twifuza ko ababishinzwe badufasha bakaduha gitifu kuko akazi kose gakorwa na SEDO (umukozi ushinzwe iterambere) iyo adahari serivise zirahagara.”

Umwe muri ba SEDO ukora kuri kamwe mu tugari tutagira Abanyamabanga Nshingwabikorwa yavuze ko bavunika cyane kuko bakora akazi kagombye gukorwa n’abantu babiri, rimwe na rimwe bikaba intantaro ya serivise mbi.

Yagize ati “Hari igihe ntanga serivise mbi bitanturutseho kuko hari igihe mara iminsi ibiri ndi mu nama abaturage batambona.”

Abo ba SEDO kandi bavuga ko iyo mikorere na bo ibagiraho ingaruka kuko badashobora kujya muri kiruhuko cy’igihe gito bemererwa n’amategeko kuko batasiga akagari konyine nta muyobozi n’umwe uhari.

Mu byifuzo byabo bahurizaho n’abaturage ni uko ubuyobozi bw’Akarere ka Huye bukwiye gushaka uko hashyirwaho Abanyamabanga Nshingwabikorwa n’abakozi bashinzwe iterambere bagafatanya gutanga serivise.

Kuri iki kibazo, umuyobozi w’Akarere ka Huye, Sebutege Ange, yabwiye IGIHE dukesha iyi nkuru ko icyo kibazo bakizi kandi bari gushaka uko cyakemuka mu bihe bya vuba.

Ati “Iki cyorezo cya Coronavirus cyakomye mu nkokora gahunda zitandukanye harimo n’iyari yatangiye yo gushaka Abanyamabanga Nshingwabikorwa batari mu myanya ariko na none bijyana n’uko abantu bagenda babona amahirwe mu yindi mirimo cyangwa se bakajya gushaka ubundi buzima, ni ikibazo dufite mu nzego z’ibanze ariko na none iyo byagaragaye abantu basimburwa n’abandi.”

Sebutege akomeza avuga ko gahunda yo gushaka Abanyamabanga Nshingwabikorwa b’utwo tugari yari yatangiye izitirwa n’icyorezo cya Coronavirus.

Ati “Gahunda irahari kugira ngo abantu babe basimbuzwa abaturage barusheho kubona serivise. Ntabwo ari i Cyarwa gusa ngira ngo ni utugari 14 tudafite Abanyamabanga Nshingwabikorwa ariko gahunda yo kubashaka yari yaratangiye, ikizamini cyanditse cyo cyarangiye hari hasigaye gukorwa ikizamini cyo mu buryo bw’ikiganiro.”

Utugari 14 two mu Karere ka Huye tudafite ba Gitifu muri Huye ni Nyakibanda; Bunazi; Muhembe; Gishihe; Gasumba; Shanga; Rugango; Ngoma; Rugogwe; Mara; Mwendo; Cyendajuru; Gisakura na Cyarwa.

Naho utugari dutandatu two muri Huye tutagira ba SEDO ni Rugarama; Kanyinya; Mutunda; Rango A; Busheshi na Kimirehe.

Igisa nk’imyigaragambyo i Rusizi, Umuvugizi w’ishyaka R2UDA rya Barafinda yandikiye umutegetsi ukomeye ku Isi, Dosiye z’IBIFI BININI: