Huye: Hongeye kurasirwa abajura babiri bahita bapfa

Agatsiko k’ababura bitwaje intwaro gakondo bongeye gutera mu kagali ka Gikombe Umurenge wa Huye, mu Karere ka Huye bashaka kwiba ibikoresho birimo amatiyo y’amazi ariko ntibyabahira kuko bakomwe mu nkokora n’ inzego z’umutekano zahagobotse bashaka kuzirwanya haraswamo babiri barapfa.

Ibi byabaye ku gicamunsi cyo kuri uyu wa Kabiri tariki ya 31 Nyakanga 2018 ahagana saa kumi n’imwe z’umugiroba.

Aba bajura bageraga kuri batandatu babiri muri bo barashatse kurwanya Polisi bahita baraswa barapfa umwe atabwa muri yombi hanyuma batatu baratoroka.

Aba babiri barashwe bagahita bitaba Imana ni uwitwa Minani Christophe w’imyaka 44 na Nsabimana Venuste w’imyaka 28 bose bo muri Gikombe ho mu murenge wa Huye.

Umwe watawe muri yombi ni uwitwa Habyalimana Stefano w’imyaka 56 akaba yajyanywe kuri Sitasiyo ya Polisi kugirango ubugenzacyaha butangire kumukurikirana.

Abaturage bo muri aka gace babonye aba bajura bari gucukura itiyo itwara amazi maze bamenyesha polisi, ihageze abajura batangira kuyirwanya babiri muri bo bararaswa abandi bariruka umwe aza gufatwa.

Umuvugizi wa Polisi mu Ntara y’Amajyepfo, CIP Emmanuel Kayigi, yatangarije Ukwezi. Com ko abo bajura barashwe bashaka kurwanya inzego z’umutekano.

Yavuze ko aba bajura bageraga kuri batandatu bafashwe barimo kwangiza itiyo y’amazi maze Polisi ibagezeho bashaka kuyirwanya ibarasaho 2 bahita bapfa.

Yagize ati "Abo bajura bose batuye mu mudugudu wa Gikombe. Bafashwe barimo kwangiza umuyoboro w’amazi ava mu musozi wa Huye ajya mu cyanya cyagenewe inganda kiri Sovu ,bafashwe bamaze gutema i tiyo y’amazi isaga metero 20."

Yakomeje agira ati "Ni babiri barashwe barapfa, bari bitwaje imihoro n’amashoka baje kwiba, inzego z’umutekano zirahagaboka bashaka kuzirwanya."

Imirambo y’aba barashwe bagahita bapfa yahise ijyanwa mu bitaro bikuru bya CHUB mu buruhukiro.

Polisi y’Igihugu ishishikariza abaturage kwicungira umutekano no gutanga amakuru kugira ngo ibyaha nk’ibyo bijye bikumirwa bitaraba.

Ubuyobozi bw’Akarere na Polisi bwazindukiye mu nama n’aba baturage mu Mudugudu wa Gikombe, Akagari Ka Sove, mu Murenge wa Huye. Izi nzego zabashishikarije gukomeza kugira uruhare mu gutanga amakuru hagamijwe gukumira ibyaha.

Ubu bujura bubaye muri ibi bice nyuma y’iminsi itanu gusa na none bateye mu Kagari ka Shyembe aho Abashinwa bari kubaka umuhanda Huye-Nyamagabe. Aba bajura bari bitwaje intwaro gakondo batemye abazamu batatu bari baharinze ariko inzego z’umutekano ziratabara zirasamo babiri barapfa kuko nabo bashatse kuzirwanya.





Tanga igitekerezo kuri iyi nkuru



Igitekerezo