Bamwe mu babyeyi bavuga ko igihe cy’ibiruhuko, cyagakwiye kuba umwanya umwiza umwana afashamo ababyeyi tumwe mu turimo two mu rugo, akanasubira mu masomo aho kwirirwa imbere ya Television na Telefoni.

Bavuga ko bahangayikishijwe n’imyatwarire ya bamwe mu banyeshuri usanga bahugiye mu matelefone na za filime, ngo ku buryo batabona umwanya wo gusubiramo amasomo yabo, no gukora izindi nshingano bashobora guhabwa n’ababyeyi.

Murihano Jean Damascene ni umubyeyi utuye mu Murenge wa Mukura, avuga ko abana bamwe biruhuko birirwa birebera Televisiyo ntibite ku gusubiramo amasomo.

Yagize ati ”Njyewe hari ubwo ndeba ab’iwanjye, bari kwirira mu matelefoni na za Televiziyo, nkarwana no kubibabuza ariko ugasanga batabyumva. Mbese ababyeyi mbona dufite uruhare runini mu gukurikirana abana bacu mu bigihe cy’ibiruhuko.”

Ku ruhande rwa bamwe mu banyeshuri bari mubiruhuko, bavuga ko Telephone zishobora kurangaza koko, ariko ko atari bose ngo kuko ushobora gukoresha iyo Telephone ukanakora izindi nshingano uba ufite nk’umunyeshuri.

Mu rwego rwo gufasha urubyiruko mu gihe cy’ibiruhuko hashyizweho gahunda y’intore mu biruhuko ishyirwa mu bikorwa n’abayobozi b’inzego z’ibanze mu turere twose tw’igihugu, aho abanyeshuri bigishwa indangagaciro zikwiye kubaranga.

---

---