Human Rights Watch ivuga ko Paul Rusesabagina ’yashimuswe ku ngufu’

Umuryango mpuzamahanga uharanira uburenganzira bwa muntu, Human Rights Watch (HRW), uvuga ko ifatwa rya Paul Rusesabugina uri mu bakomeye batavuga rumwe n’ishyaka riri ku butegetsi mu Rwanda (FPR) ryakozwe mu buryo bwo kumushimuta ku ngufu kandi ko ibyo ari ihonyorwa rikomeye ry’amategeko mpuzamahanga.

Mu itangazo HRW yasohoye kuri uyu wa Gatanu tariki ya 11 Nzeli 2020, ivuga ko leta y’u Rwanda ikwiye guhita yemerera Bwana Rusesabagina kubonana n’abo kumwunganira mu mategeko yahisemo, akaganira na bo mu ibanga kandi akajya avugana n’umuryango we mu buryo buhoraho.

Mu kiganiro yatanze kuri Radio na Televiziyo y’u Rwanda ku Cyumweru, Perezida Kagame yavuze ko kuva aho Rusesabagina "yavuye kurinda agera hano, nta cyaha cyigeze gikorwa hagati aho ngaho na kimwe".

HRW ikomeza ivuga ko akwiye guhita yemererwa gukoresha uburenganzira bwe bwo guhinyuza mu mategeko uburyo yafashwemo, akaburanirwa n’abanyamategeko yihitiyemo kandi akaburanishwa mu rukiko rwigenga rukurikiza amategeko mpuzahamaganga ajyanye n’uburenganzira bwa muntu.

David Rugaza uri mu bari kumwunganira ubu, yabwiye BBC ko ngo Rusesabagina yamuhisemo ku bushake kandi "afite uburenganzira bwo kumugumana cyangwa kumureka agafata abandi".

HRW ivuga ko abo mu muryango wa Bwana Rusesabagina wahunze u Rwanda mu 1996, bayibwiye ko bohererezanyije ubutumwa bwa WhatsApp ku mugoroba wo ku itariki ya 27 y’ukwezi gushize kwa munani yerekeje i Dubai muri Emira Zunze Ubumwe z’Abarabu (UAE) ari mu ndege.

Ngo kuva icyo gihe ntabwo umuryango we wongeye kubasha kuvugana na we cyangwa ngo umenye icyamubayeho, kugeza umubonye i Kigali ku itariki ya 31 y’ukwa munani ubugenzacyaha bw’u Rwanda (RIB) bumwereka itangazamakuru aregwa ibyaha by’iterabwoba.

Umuryango we uvuga ko ku itariki ya 8 y’uku kwezi kwa cyenda ari bwo wavuganye na we bwa mbere kuva icyo gihe.

Ubu hari amatsinda abiri y’abunganizi be mu mategeko.

Iryo mu Rwanda rivuga ko yarihisemo ariko ritemerwa n’umuryango wa Rusesabagina, ndetse n’irindi ririmo n’abanyamahanga ryatoranyijwe n’umuryango we ariko ryangiwe n’u Rwanda kumwunganira nk’uko HRW ibivuga.

Bwana Rusesabagina ntaragezwa imbere y’urukiko, ahitezwe ko ashobora kugira icyo avuga ku bazamwunganira mu rubanza rwe.

HRW ivuga ko ihonyorwa ry’uburenganzira bwa Paul Rusesabagina riteye impungenge zo kwibaza niba azahabwa ubutabera mu rubanza.

Urubanza mu ruhame

Lewis Mudge, ukuriye HRW mu karere k’Afurika yo hagati, yagize ati "Kuba u Rwanda rutarakurikiranye Rusesabagina runyuze mu buryo buteganywa n’amategeko bwo kohererezanya abacyekwaho ibyaha, bica amarenga ko abategetsi batizeye gihamya bafite cyangwa ko ibyangombwa byatuma habaho ubutabera bitahura n’ibisabwa mu rukiko rwigenga, none bahisemo kutubahiriza amategeko".

Ku by’urubanza rwe, ku Cyumweru Perezida Paul Kagame yavugiye kuri Televiziyo y’u Rwanda ko ruzabera mu ruhame.

Yagize ati "Tuzi neza inshingano zacu, no mu rubanza nk’uru rukurikiwe cyane... Ruzabera mu ruhame, abitaye ku mucyo, kutabogama n’ibindi…rwose turumva neza iyo nshingano yo kubikora na byo".

Rusesabagina w’imyaka 66, yamenyekanye nyuma yo gushingirwaho inkuru ya Filimi Hotel Rwanda y’abemeje ko yabarokoye muri Hôtel des Mille Collines muri Jenoside yo mu Rwanda mu 1994.

Ni umukuru wungirije w’ihuriro ry’amashyaka ya politiki atavuga rumwe na leta MRCD-Ubumwe, ihuriro rifite umutwe wa gisirikare wa FLN ukorera mu burasirazuba bwa DR Congo.

Mu 2018, umutwe wa FLN wigambye ibitero ku butaka bw’u Rwanda ahegereye ishyamba rya Nyungwe, ibitero byaguyemo abantu. U Rwanda ruvuga ko ibyaha aregwa bishingiye kuri ibyo bitero.


Paul Rusesabagina yeretswe abanyamakuru ku wa mbere tariki 31/08 mu gihe cy’umwanya muto, ntiyahawe umwanya wo kugira icyo avuga

Amagambo akomeye Sankara yavuze kuri Rusesabagina uri mu minwe y’igipolisi:





Tanga igitekerezo kuri iyi nkuru



Igitekerezo
Alias kawesa Kuya 11-09-2020

Ubu igihari nuko ari mumaboko yabo yakoreye ibyaha kandi mugihugu kiwe, naho HRW ibyayo biramenyerewe ninkabyabindi bya BBC barivugira.