Hari gupimwa COVID-19 ku mihanda itandukanye ya Kigali

Kuva mu gitondo cyo kuri uyu wa Kane tariki ya 02 Nyakanga 2020, ku mihanda itatu itari gukoreshwa n’abantu benshi mu mujyi wa Kigali hari gufatwa ibipimo bya Coronavirus ku bantu batandukanye bayinyuraho.

Ikigo cy’igihugu gishinzwe ubuzima mu Rwanda, RBC, kivuga ko "kigamije gusesengura uko icyorezo cya COVID-19 gihagaze mu Mujyi wa Kigali".

Leta y’u Rwanda iheruka gutangaza ko igiye kongera ibikorwa byo gupima abantu ku bwinshi.

Gufata ibipimo biri gukorerwa ku mihanda itatu;

- Ku muhanda wa Kicukiro hafi y’ishuri rikuru ry’ubumenyi-ngiro rya IPRC
- Ku muhanda wa Remera imbere ya Stade Amahoro uciye mu Migina
- Ku muhanda wa Remera ugana ahazwi nko kuri KIE cyangwa kwa Rwahama.

Bamwe mu bari gufata ibi bipimo babwiye BBC ko bibanda ku masaha ya mu gitondo abantu bari kujya mu kazi no ku masaha ya nimugoroba abantu bavuye ku kazi.

Abapolisi barahagarika bamwe mu bakoresha umuhanda - nta kurobanura, abatwaye imodoka, abatwara moto n’abanyamaguru - bakaberekeza ahafatirwa ibipimo iruhande rw’umuhanda.


Abapolisi barahagarika abakoresha umuhanda bamwe bakaberekeza ahari gufatirwa ibipimo

Gufata igipimo mu muhogo cyangwa mu mazuru, ni igikorwa kimara umwanya mutoya nyuma y’uko upimwe yanditswe umwirondoro n’ibindi bimuranga.

Kuri Stade Amahoro, umumotari umwe yabwiye BBC ko yahagaritswe n’umupolisi akamutegeka ko ajya aho bamufata igipimo.

Undi mumotari avuga ko "yishimiye gupimwa kuko aba ari mu muhanda kenshi" bityo aba afite ibyago byinshi byo kwandura Covid-19.


Igipimo gifatwa imbere mu muhogo ugifashwe agakomeza akagenda

Dr Sabin Nsanzimana uyobora ikigo RBC yabwiye abanyamakuru ko ku ikubitiro muri iki gikorwa bagiye gupima abantu 2,000 ariko ko bashobora kongera umubare bitewe n’ibizava mu bipimo.

Ibisubizo kuri ibi bipimo Nsanzimana avuga ko biboneka mu gihe kitarenze amasaha 48, aba bapimwa bakazamenyeshwa uko bahagaze kuri Telefone zabo.


Mbere yo gupimwa barandika umwirondoro n’ibindi biranga ugiye gupimwa

Nsanzimana avuga ko agaciro k’igipimo kimwe ku muntu kari hagati y’amadorari ya Amerika 50 na 100 (ari hagati ya 50,000 na 100,000 mu mafaranga y’u Rwanda).

Kuva mu kwezi kwa Gatatu mu Rwanda hamaze gufatwa ibipimo birenga 140,000 bya Covid-19, hamaze kuboneka abantu 1,042 bayanduye, 480 bayikize na batatu yishe.


Umumotari ari gufatwa igipimo cya Covid-19 muri iki gitondo

RIB n’Ubushinjacyaha baritana ba mwana kuri Dosiye ya Dr Isaac Munyakazi n’andi makuru menshi utapfa gusanga ahandi ni k’UMUBAVU TV ONLINE:





Tanga igitekerezo kuri iyi nkuru



Igitekerezo