Guhimba indirimbo ivuga ibyo u Rwanda rwagezeho byashyize ubuzima bwe mu kaga

Umuhanzi nyarwanda ariko kuri ubu ukorera muzika mu gihugu cya Mozambique witwa Mugisha Clément, aravuga ko ari mu mazi abira nyuma yo kuririmba indirimbo igaragaza ibyiza u Rwanda rumaze kugeraho nyuma y’imyaka 23.

Mugisha w’imyaka 21 y’amavuko, ni umwe mu rubyiruko rw’Abanyarwanda baba hirya no hino ku Isi baherutse kwitabira Itorero ‘Urunana rw’Urugano’ ryabereye mu kigo cya gisirikare cya Gabiro hagati ya tariki 06 na 16 Ukuboza 2017.

Mugisha ukiri mu Rwanda kugeza magingo aya, yasobanuye ko intandaro y’ibibazo arimo ari indirimbo yise ‘Rwanda Rwiza’ yahanze amaze kubona inyubako ya Kigali Convention Center maze ayiririmbira mu nkera y’imihigo y’urubyiruko yabereye muri “Petit Stade” mbere gato y’uko inama y’igihugu y’umushyikirano ya 15 iba.

Mu kiganiro n’Ikinyamakuru izubarirashe.rw, Mugisha yagize ati “Iyo ndirimbo nayiririmbiye muri Petit Stade, nagiye kubona mbona Abanyarwanda bamwe b’iwacu muri Mozambique banyohereje video yanjye ndi kuririmba iyo ndirimbo bambwira ko bazanyica kubera ko amagambo ndirimbamo bo badashaka.”

Mugisha kandi asobanura ko ari kuryozwa n’Abanyarwanda bagenzi be babana muri Mozambique amagambo yavugiye mu nama y’igihugu y’umushyikirano yakurikiye inkera y’imihigo y’urubyiruko, aho ngo yashimiye Perezida Kagame agaciro aha urubyiruko rwo mu mahanga bityo anamusezeranya kwereka ukuri Abanyarwanda bari mu mahanga basebya ibyo u Rwanda rumaze kwigezaho.

Mugisha yagize ati “Nagize amahirwe yo gutoranywa muri bamwe mu rubyiruko rwavugiye abandi mu mushyikirano, mu ijambo navuze nashyimiye Nyakubahwa Perezida Paul Kagame naravuze nti ‘twebwe nk’abadiasora turashaka gutanga imbaraga zacu tugahaguruka tukabwira ba bandi bafite imyumvire mibi tukababwira ibyo twize n’ibyo twiboneye ku Rwanda ubundi bakareka kugenda baruvuga nabi’.”

Akomeza agira ati “Abanyarwanda b’iwacu muri Mozambique umenya bararakajwe n’iryo jambo, kuko bakomeje kunyohereza ubutumwa bugufi banca intege ngo bazanyica kubera ibyo navuze, bamwe muri bo ahari baba bikeka ibyo basize bakoreye u Rwanda n’uruhare rwabo muri Jenoside yakoreweAbatutsi.”

PNG - 627.2 kb
Uturutse iburyo, Mugisha ni we ubanza(uwambaye agakoti gafite ibara ry’umukara) aha yari mu Ntara y’Amajyaruguru y’u Rwanda


Yiyemeje gukiza ubuzima bwe aguma mu Rwanda

Ubusanzwe Mugisha ngo yari afite itike y’indege y’itariki ya 23 Ukuboza 2017, ariko ngo nyuma yo kubyumvikanaho n’ababyeyi be yafashe umwanzuro wo kuguma i Kigali ngo arebe aho ikibazo cye cyerekera hakaba hari umuryango umucumbikiye.
Nubwo akiri mu cyeragati ku gusubira mu gihugu ababyeyi be barimo, Mugisha avuga ko atazacibwa intege n’abakomeje kumutera ubwoba ku bihangano bye n’imvugo yakoresheje abanenga.

Uyu musore avuga kandi ko ari hafi gushyira ahagaraga indi ndirimbo yise ‘Twubake Ubumwe’, akaba ngo ari indirimbo ihamagarira urubyiruko ruri imbere mu Rwanda no hanze yarwo kunga ubumwe bakorera hamwe mu rwego rwo kwigira no kwihesha agaciro.

Cyakora, Mugisha avuga ko yifuza ko ikibazo cye cyabonerwa umuti akumva yisanzuye kandi ntadindire mu mashuri ye, ati “Nari ngiye mu mwaka wa kabiri muri Kaminuza hariya muri Mozambique numva ngumye aha ngaha nkiga, nkabona ishuri nkiga ntacyo numva nikanga, nkanaririmba, ngataka igihugu cyanjye, nkakorera igihugu cyanjye nta muntu umbuza byamfasha cyane.”

Inzego zitandukanye zaramenyeshejwe

Eng. Murenzi Daniel, umuyobozi ushinzwe Abanyarwanda baba mu mahanga ku rwego rw’Isi, avuga ko ikibazo cya Mugisha cyamaze kugezwa ku nzego zitandukanye kireba harimo n’ambasade kugira ngo gishakirwe umuti bityo ngo kikaba cyigikurikiranwa.

Eng.Murenzi ashima umuhate wa Mugisha mu kugaragaza ashize amanga ibibera mu Rwanda, gusa avuga ko kuba Mugisha yaribasiwe bigiye gutera umuryango w’abanyarwanda baba mu muhanga kongera imbaraga mu bikorwa birwanya abapfobya ibyo u Rwanda rumaze kugeraho, ati “kuba aba bana ba Mugisha baraje mu itorero bagahura n’icyo kibazo ni urugero rutwereka ko imyumvire ikiri hasi kuri bamwe, bivuga ko inshingano zacu tutazirangije ahubwo tugomba kuzongeramo imbaraga kugira ngo bariya bo muri Mozambique n’abandi hirya no hino tubarwanye.”

Eng.Murenzi akomeza agira ati “Abanyarwanda baba mu mahanga dufite inshingano yo kugaragaza isura y’ibibera mu gihugu cyacu, tubwiza ukuri abantu aho u Rwanda ruvuye, aho rugana cyane cyane tutirengagiza ko hari bamwe babihakana cyangwa bakabyirengagiza nkana.”

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo