Giti: Imwe muri Komini 143 zari agize u Rwanda muri 1994 yakumiriwemo Jenoside yakorewe Abatutsi

Kuva tariki ya 07 Mata 2018, mu Rwanda hokemeje icyunamo cyo kwibuka ku nshuro ya 24 Jenoside yakorewe Abatutsi, iyi Jenoside yabereye mu gihugu cyose uretse Komini imwe gusa bivugwa ko ariyo yashoboye kuyikumira.

Iyo Komini ni iyitwaga “Giti” kuri ubu iri mu Burasirazuba bw’igihugu, yayoborwaga n’umugabo ushimirwa ko yarwanyije ubu bwicanyi agashishikariza abaturage yari ayoboye gushyira hamwe.

Iyahoze ari Komini Giti yari imwe mu makomini yari agize Perefegitura ya Byumba icyakora ubu ntikibaho. Igice kimwe cyayo ubu kibarizwa mu Karere ka Gatsibo naho ikindi cyometswe kuri Gicumbi.

PNG - 658.9 kb
Iki ni icyapa cyerekana iyahoze ari Komini Giti, kuri ubu ni Umurenge wa Giti


Aka ni ko gace konyine k’igihugu Jenoside yakorewe Abatutsi bivuga ko itagezemo.
Ni nk’igitangaza kuko iyi ari yo Komini yonyine rukumbi itaritabiriye gukora Jenoside ku makomini 143 yari agize igihugu muri 1994.

PNG - 405.6 kb
Kuri uyu musozi ni ho ibiro bya Komine Giti byari byubatse, ubu ni mu murenge wa Bukure


Bamwe mu baturage batuye muri iyi Komini baganiriye na BBC yanditse iyi nkuru bagira bati “Abaturage bo muri iyi Komini bari beza cyane, uwo mugambi ntawo bari bafite rwose, twari tubanye bisanzwe ".

Ku batuye aka gace bose barashima uyu wari umuyobozi wabo muri icyo gihe.

PNG - 859 kb
Aba ni bamwe mu baturage bo muri Komini ya Giti


Kuri bo ngo umuyobozi wabo yafashishije abaturage kwima amatwi inyigisho zahamagariraga urwango n’amacakubiri.

Aba baturage bagize bati "Hari icyo bita gushishikariza abantu. Ibyo rwose ntabyabaye hano. Sebushumba watuyoboraga barabimukozaga ati ‘reka singiye kuryanisha abaturage banjye’”.

PNG - 816.7 kb
Uyu ni Edouard Sebushumba wahoze ari Bourgmestri wa Komini Giti


Kuri ubu uyu wari Bourgmestri wa Komini Giti, Edouard Sebushumba ni umusaza uri mu kiruhuko cy’izabukuru.

BBC yamusanze ahagarikiye abakozi mu ishyamba rye, imubaza ibanga yakoresheje ngo akumire Jenoiside ntigere ku butaka bwe maze asubiza mu magambo akurikira agira ati "Ikintu cyamfashije ni umuco nari nariyubatsemo ndetse narawubatse no mu baturage banjye. Umuco wo kurwanya akarengane, urugomo, umuco wo kudahana. Ikindi nta muturage wari gufata umuhoro ngo ateme umututsi kandi abona ubutegetsi butabishyigikiye".

Mu mwaka wa 1996, Bwana Sebushumba ari mu ba mbere bahawe imidari y’ishimwe kubera ubutwari yagize.

Sebushumba Edouard, ni umwe mu bategetsi mbarwa batahamagariye abahutu gutsemba abatutsi mu gihe abandi bagiye banengwa ko bafashe iya mbere muri ubu bwicanyi.

Benshi mu bari abayobozi b’amakomini icyo gihe barafashwe barafungwa ndetse abatari bake baracyari mu munyururu kubera uruhare bahamijwe bagize muri Jenoside yakorewe Abatutsi muri Mata1994.

@Umubavu.com





Tanga igitekerezo kuri iyi nkuru



Igitekerezo
Boringo Kuya 10-04-2018

Uyu Burugumesitiri rwose arashimishije cyane.
Uwo mutima Imana Izawumuhere umugisha!
Nubwo ari nayo yamufashije kubikora!
IMANA yarakoze cyane!
Ibaze ni ukuri, iyo nza kuba ntuye hafi ya Giti nariguhita njya kwihisha yo pe!