Gisagara: RIB ifunze Gitifu wakubise umwana bikamuviramo urupfu

Urwego rugenza ibyaha mu Rwanda ruzwi nka RIB rubinyujije kuri Twitter yarwo kuri uyu wa Mbere tariki ya 28 Ukuboza 2020 rwatangaje ko rwataye muri yombi Umunyamabanga Nshingwabikorwa w’Umurenge wa Mukindo mu Karere ka Gisagara akurikiranyweho icyaha cyo gukubita umwana witwa Musabyemahoro Etienne w’imyaka 15 bikamuviramo urupfu.

RIB yataye muri yombi uyu Gitifu nyuma yuko aya makuru amenyekanye kuri uyu wa Mbere by’umwihariko atangajwe n’ibitangazamakuru bitandukanye byageze muri uyu Murenge bikabwirwa iyi nkuru ibabaje.

Ibinyujije kuri Twitter yayo kuri uyu wa Mbere, RIB yagize iti "RIB yataye muri yombi Tumusifu Jerome, Umunyamabanga Nshingwabikorwa w’Umurenge wa Mukindo mu Karere ka Gisagara, ukurikiranyweho icyaha cyo gukubita Musabyemahoro Etienne w’imyaka 15 bikamuviramo urupfu".

Yakomeje iti "Uyu mwana yakubitiwe mu Mudugudu wa Kanto II, Akagari ka Saga, Umurenge wa Muganza mu Karere ka Gisagara ku itariki 25/12/2020 yitaba Imana tariki 27/12/2020 bikaba bikekwa ko urupfu rwe rufitanye isano no gukubitwa".

"Iperereza rirakomeje hashakishwa impamvu yateye urupfu kugira ngo hakorwe dosiye ishyikirizwe Ubushinjacyaha".

Icyakora nubwo RIB yafunze uyu Gitifu gusa, hari abaturage babwiye BWIZA ko Musabyamahoro yafashwe na Polisi yari kumwe n’uyu Gitifu ubwo harebwaga uko kubahiriza amabwiriza yo kugera mu rugo yubahirizwa, bakamukubita nyuma bakajya kumufungira mu Murenge wa Mukindo, aho yavuye ajyanwa kwa Muganga, bikavugwa ko yanyaraga amaraso, atavuga ndetse atananyeganyega.

Umwe mu baturage bari ku gasanteri ka Kanto kari hagati y’Umurenge wa Muganza na Mukindo Nyakwigendera yakunitiweho, yagize ati "Nari ku gasanteri, batubwira ko imodoka ya Gitifu itejemo, Hari nka saa moya na 15, kuko nkorera hariya hakurya, nahise mfunga".

"Nabonye Gitifu ahagarika agahungu ka mbere, aravuga ngo dore iki cyana kingana gutya dore cyanyoye inzoga, cyasinze. Yahise agakubita, arakadarapura, agakubita hasi, kagiye kweguka agakubita hasi. Aravuga ngo nambaye itiriningi ntiwanshika".

"Yabajije abanyerondo ngo ibintu by’ino aha kuki mutabikubita? Yaravuze ngo uretse Abarundi cyangwa abanyamahanga, Abanyarwanda mujye mubakubita (...)".

Uyu muturage ucururiza mu gasanteri ka Kanto yakomeje ngo "Mu gitondo ku wa Gatandatu ngiye mu isoko ryo mu Kabuga, abantu bambwiye ko mu gitondo nkimara kugenda hakubiswe abantu benshi kandi ngo harimo agahungu k’inyagafumberi bavugaga ko ngo ntikari buramuke".

"Abapolisi baraje bagashyiramo amapingu, kubera gutaka Gitifu yari yasabye ko bagafungura ariko nta mapingu bari bazanye. Babafunganye n’uwitwa Barirwanda wari uje kuri moto wakubiswe ashaka kubacika".

"Bahise babajyana, ndi mu Kabuga, numvise inkuru ko ka gahungu bakubise, kiriwe kanyara amaraso aho bari bagafungiye. Nyuma nibwo twumvise ko uwo mwana yapfuye."

Uyu muturage avuga ko Gitifu Tumusifu Jerome ari mushyashya, ko yabahahamuye, ati "Aza isaha zitaragera kuko saa moya aba yatangiye gukubita. Gitifu ari gukubita abaturage cyane, nta muntu uhumeka. Ubuyobozi buturenganure, uriya muyobozi arabangamye cyane, aza mbere ya saa mbili. Abantu ba hano bashaka kuyoborwa na Gitifu wa Muganza, ubanza kubaganiriza."

Ni mu gihe umwe mu banyerondo Lizinde Jean Bosco wari aho mu isanteri, we yavuze ko " [Gitifu] Yamukubitiye inyuma y’imodoka tutareba neza ariko twabonaga harimo inshyi, imigeri n’inkokora ari na ko amukoresha amapombaje ari na ko agwa, akongera agahaguruka, twumvaga ataka. Gitifu yatashye nka saa sita."

Mukuru wa nyakwigendera witwa Bayahure Emmanuel yabwiye BWIZA ko umwana wabo yapfuye anyara amaraso, ndetse ko atabashaga guhumeka ngo ashyitse umwuka. Uyu yemeza yivuye inyuma ko bigaragara ko yari yakubiswe cyane, bamunogeje, bamukubita imigeri yo mu kiziba cy’inda".

RIB ikaba yavuze ko uyu Gitifu yamaze gutabwa muri yombi ndetse iperereza rikaba rikomeje ngo hamenyekane impamvu yateye urupfu rw’uriya mwana w’imyaka 15 y’amavuko.

Gitifu w’Umurenge wa Mukindo akurikiranyweho icyaha gihanwa n’ingingo ya 121 iteganya ko umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.

Iyo gukubita cyangwa gukomeretsa byateye urupfu, igihano kiba igifungo kitari munsi y’imyaka 15 ariko kitarenze imyaka 20 n’ihazabu y’amafaranga y’u Rwanda atari munsi ya miliyoni 5 Frw ariko atarenze miliyoni 7 Frw.

Diane Rwigara aravuga ko hari umwuzukuruza w’Umwami Musinga washimuswe! Umugore yishwe arashwe n’abitwaje intwaro bateye urugo:





Tanga igitekerezo kuri iyi nkuru



Igitekerezo