Gisagara: Abapolisi b’u Burundi baravugwaho gushimuta abana batanu b’Abanyarwanda

Bamwe mu baturage bo mu karere ka Gisagara mu Murenge wa Mukindo mu Tugari twa Nyabisagara na Gitega, bavuga ko abana babo bashimuswe n’abapolisi bo mu Burundi bagasaba ubuyobozi bw’u Rwanda kubafasha abana babo bakagaruka mu Rwanda.

Aba baturage bavuga ko abana babo bashimuswe ubwo bari bagiye kwahira ubwatsi bw’amatugo mu rufunzo rw’uruzi rw’Akanyaru rugabanya u Rwanda n’u Burundi, bakemeza ko hagiye gushira ukwezi aba bana batwawe.

Ndayisaba Samuel utuye mu Mudugudu w’Akabati avuga ko aba bana batanu bafatiwe ku ruhande rw’u Rwanda bari kwahira ubwatsi mu migano.

Ndayisaba na bagenzi bahuje ikibazo cyo gutwarirwa abana, bavuga ko aba bapolisi bari kumwe n’Imbonerakure bose hamwe ari nka bane. Ngo bari bihishe mu migano abana bajya kureba bagira ngo ni umuntu wapfiriye mu migano bafatwa batyo.

Ababyeyi bakomeza bavuga ko nyuma yo gufatwa, aba bapolisi banditse amazina y’abana, barangije bafata umwana umwe muri bo bamuha urwandiko ngo agende abwire buri mubyeyi ufite umwana muri aba bafashwe amanukane amafaranga ibihumbi 15 byo kumugomboza.

DASSO yaherekeje ababyeyi ubwo bari bajyanye aya mafaranga ibihumbi 15 byo kugomboza abana, abapolisi b’u Burundi babibonye bahita batwara abo bana.

Aba bose hamwe bari batandatu barimo uwitwa Jean Paul Irasubiza na Tuyishime Jean de Dieu. Irasubiza ni we bivugwa ko yahawe urwandiko rusaba ababyeyi amafaranga ibihumbi 15 bituma abafashwe basigara ari batanu.

Ndayisaba Samuel ati “Niba bakiriho cyangwa barapfuye ntabwo tubizi”.

Uwimbabazi Hycenthe watwariwe umwana witwa Noel Jean Claude yagize ati “Abayobozi badukorere ubuvugizi turebe ko abo bana bagaruka cyangwa babaze ko abo bana bapfuye nyine tubimenye. None se Leta y’ubumwe irimo iracyura impunzi zabo, natwe nibatuzanire abacu”.

Imvura iheruka y’i Tumba yatumye uruzi rw’Akanyaru ruhindura inzira hamwe mu hari mu Rwanda hajya mu Burundi na hamwe mu hari mu Burundi hajya ku ruhande rw’u Rwanda.

Umuyobozi w’Akarere ka Gisagara, Rutaburingoga Jerome avuga ko uku guhindura inzira k’uru ruzi bituma hari abibeshya ku mbibi z’ibi bihugu akaba yakwisanga ku butaka bw’ikindi gihugu atabizi.

Rutaburingoga avuga ko nk’Akarere bafite icyizere ko aba bana bazagaruka kuko Akarere ka Gisagara kari mu biganiro na Komine Ngozi yatwaye aba bana.

Agira ati “Twarabimenye kandi twanamenye ko Abanyarwanda ari bo bagiye ku ruhande rw’u Burundi bagiye kwahira ubwatsi bw’amatungo, gusa ntibyari bikwiye ko babatwara.”

Jerôme Rutaburingoga agira inama abatuye Akarere ka Gisagara kwirinda kujya bambuka ngo bage mu Burundi kuko bitemewe by’umwihariko muri ibi bihe bya COVID-19.

Ababyeyi b’aba bana bafite inyemezabwishyu zigaragaza ko baciwe amande y’amafaranga y’u Rwanda ibihumbi 10 buri muntu yo kurenga ku mabwiriza yo kwirinda Covid-19. Ibi byabaye nyuma y’uko abapolisi b’u Burundi batwaye aba bana.

Ibi kandi bibaye mu gihe hashize imyaka 5 umubano w’u Rwanda n’u Burundi ujemo agatotsi. U Rwanda rushinja u Burundi gutera inkunga imitwe ihungabanya umutekano warwo, u Burundi na bwo bugashinja u Rwanda gucumbikira abagerageje guhirika ubutegetsi bwabwo muri 2015. Buri gihugu ibyo gishinjwa kirabihakana.

Abaturagte basenyewe amazu i Nyarutarama hanzwi cyane nka ’Bannyahe’ bibaza niba Leta yarakennye ku buryo idashaka kubishyura ingurane ikwiye y’imitungo yabo nkuko yabazwe ndetse ikaba inagaragara ku igenagaciro bafite:





Tanga igitekerezo kuri iyi nkuru



Igitekerezo