Gicumbi: Polisi yafashe uwinjizaga Mayirungi mu gihugu

Polisi y’u Rwanda ikorera mu karere ka Gicumbi, ku itariki ya 30 Mata yafashe umusore wageragezaga guha ruswa umupolisi, ubwo yari amaze gufatwa ashaka kwinjirana mu gihugu udupfunyika 237 tw’ikiyobyabwenge cya “Mayirungi”.

Umuvugizi wa Polisi mu Ntara y’Amajyaruguru Chief Inspector of Police (CIP) Hamdun Twizeyimana, yavuze ko uwafashwe yitwa Iradukunda Pacifique, akaba yarafashwe ubwo yageraga ku mupaka wa Gatuna ari mu modoka ifite icyapa kiyiranga UAQ 238 U, ubuyobozi bukamukekaho ko afite ibiyobyabwenge, abimenye asiga iyo modoka aho aracika.

CIP Twizeyimana yavuze ati:”Amaze gusiga iyo modoka ye aho, nyuma yaho gato yaragarutse, ashaka guha ruswa y’ibihumbi 200,000 umupolisi w’ishami rya Polisi y’u Rwanda rishinzwe kurwanya magendu (Revenue Protection Unit) rikorera ku mupaka wa Gatuna ngo arekure iyo modoka ye, ariko ntibyamuhiriye kuko uwo mupolisi yahise amufata.”

Mayirungi ni ikiyobyabwenge abantu bahekenya nka shikareti cyangwa ubunyobwa bukaranze kikaba kiva mu byatsi bita mu rurimi rw’icyongereza (Catha edulis).

Yavuze kandi ati:”Mu Rwanda Mayirungi iri ku binyobwa byongewe ku rutonde rw’ibiyobyabwenge, bityo bikaba bibujijwe mu Rwanda nk’uko byasohotse mu mugereka wa I w’Iteka rya Minisitiri w’ubuzima Nº20/35 ryo ku wa 09/6/2015 rigena ibinyobwa bitemewe n’ibindi bintu bicungwa kandi bifatwa nk’ibiyobyabwenge n’urusobe rw’imiti ikoreshwa nka byo.”

CIP Twizeyimana yavuze ko Iradukunda yashyikirijwe Urwego rw’Igihugu rushinzwe ubugenzacyaha (RIB) rukorera kuri Sitasiyo ya Polisi ya Kaniga, anavuga ko igika cya 2 cy’ingingo ya 594 yo mu gitabo ahana ibyaha mu Rwanda kivuga ko umuntu wese winjiza, ugurisha mu gihugu ibiyobyabwenge mu buryo bunyuranije n’amategeko, ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000).

Yavuze ariko ko iyo ibikorwa bivugwa muri iki gika cya 2 cy’iyi ngingo iyo bikozwe mu rwego mpuzamahanga nk’uko byakozwe n’uyu Iradukunda, ibihano byikuba kabiri.





Tanga igitekerezo kuri iyi nkuru



Igitekerezo