Gen Kayihura ashinjwa kohereza mu Rwanda abakekwaho ibyaha


General Kale Kayihura wamaze imyaka 12 ari Umuyobozi Mukuru wa Polisi ya Uganda, yagejejwe imbere y’Urukiko rwa Gisirikare ashinjwa ibyaha bitatu birimo icyerekeye u Rwanda.

Ku wa 13 Kamena 2018 nibwo Kayihura yatawe muri yombi mu buryo bwatunguranye, nyuma y’amezi atatu akuwe ku mwanya w’Umuyobozi wa Polisi.

Umunyamategeko wa Gen Kayihura yabanje kuvuga ko igisirikare cyarenze ku Itegeko Nshinga n’amategeko Uganda igenderaho, kuko uwo yunganira yari amaze iminsi 72 ihwanye n’amasaha 1728 ataragezwa imbere y’urukiko.

Ni mu gihe uwafashwe atagomba kurenza amasaha 48 ataragezwa imbere y’urukiko.

Gen Kayihura akurikiranyweho kunanirwa gucunga ibikoresho by’intambara, kugenzura igisirikare no gufasha mu ‘ishimuta’ no gucyura abanyarwanda bari mu buhungiro muri Uganda.

Ubushinjacyaha bwa Uganda buvuga ko Kayihura yananiwe kurinda ibikoresho by’intambara, agaha imbunda abantu batabyemerewe n’amategeko barimo abatwara moto bari bibumbiye mu cyitwa ‘Boda Boda 2010’.

Imbere y’urukuko, uyu mugabo yahakanye ibyaha byose ashinjwa.

Umwunganizi we yasabye ko yarekurwa by’agateganyo akaburana ari hanze. Urukiko rwamubwiye ko ubusabe bwe yabushyira mu nyandiko bukazigwaho ku wa 28 Kanama.

Kimwe mu byaha ashinjwa, kiri mu mikoranire y’u Rwanda na Uganda

Kayihura ashinjwa uruhare mu gucyura mu Rwanda abari muri Uganda mu buhungiro, gusa bose bakekwagaho ibyaha.

Muri abo bacyuwe mu Rwanda harimo Lt Joel Mutabazi wakatiwe gufungwa burundu.

Mu mibanire ya Polisi ya Uganda n’u Rwanda ishingiye ku masezerano yiswe ‘kurwanya iterabwoba, icuruzwa ry’ibiyobyabwenge n’ibyaha byambukiranya imipaka’; zagiye zihererekanya abanyabyaha.

Ayo yifashishijwe mu bihe bitandukanye mu guhererekanya abakekwaho ibyaha hagati y’ibihugu byombi, urugero rwa Mutabazi ku ruhande rw’u Rwanda na Namuyimbwa Shanita uhimbwa ‘Bad Black’ ku ruhande rwa Uganda.

Abandi bantu 36 bahererekanyijwe n’ibihugu byombi mu buryo bumwe n’ubwa Mutabazi cyangwa Bad Black.

Muri aba, Uganda yasabye ndetse inashyikirizwa 26 ugereranyije n’icumi boherejwe mu Rwanda.

Aya masezerano yabaye ingirakamaro kuko yarokoye abakobwa benshi b’Abagande n’Abanyarwandakazi bari bagiye gucuruzwa muri Aziya.

Nyuma yo kwitaba urukiko ku nshuro ya mbere, iburanisha ryasubitswe rikazasubukurwa ku wa 4 Nzeri 2018.

Kuva Kayihura yatabwa muri yombi, afungiye mu nzu y’ibyumba bibiri iri mu kigo cya Gisirikare cya Makindye mu Mujyi wa Kampala.

Umubavu.com





Tanga igitekerezo kuri iyi nkuru



Igitekerezo