Gatsata: Ubugizi bwa nabi bwahagurukije inzego

Abaturage bo mu Murenge wa Gatsata mu Karere ka Gasabo mu Mujyi wa Kigali, bavuga ko bahangayikishijwe n’umutekano wabo nyuma y’abagizi ba nabi badutse muri ako gace, bamaze kwica abantu bane barimo babiri batewe ibyuma, mu kwezi kumwe.

Muri ibyo bikorwa by’ubugizi bwa nabi, ku wa 28 Kanama 2018, muri uwo Murenge bahiciye umusore uri mu kigero cy’imyaka 25, atewe ibyuma.

Abaturage bavuga ko aba bagizi ba nabi bitwikira umwijima ugaragara ku muhanda Gatsata-Karuruma ugana Gatuna, kuko icyo gice kitariho amatara ku muhanda.

Hari ababwiye IGIHE ko muri abo bantu bane baheruka kwicwa, babiri batewe ibyuma naho abandi bigakekwa ko banizwe kuko nta bikomere babasanganye.

Umuturage umwe yagize ati “Nta mutekano ubu dufite kuko dusigaye dutinya gutaha nyuma ya saa moya kubera ko hari abasigaye bategera abantu mu nzira bakabateragura ibyuma, ubu mu kwezi kumwe gusa bamaze kwica abantu bane.”

Tuyishime Moses uwara abagenzi ku igare we yavuze ko nyuma ya saa tatu z’ijoro, biba bitoroshye kuhanyura.

Yakomeje agira ati “Akenshi haba hari abantu batangira umuntu bakamwambura ibyo afite. Baramutse bashyize amatara kuri uriya muhanda twizera ko ikibazo cyakemuka.”

Umunyamabanga Nshingwabikorwa w’Umurenge wa Gatsata Ntiyamira Faustin, avuga ko biyemeje gukaza irondo mu masaha y’ijoro, kugira ngo ubu bugizi bwa nabi babuhashye.

Yagize ati “Igikuru ni ugukaza amaronndo cyane cyane nijoro no gukangurira abaturage gushyiraho itara ry’umutekano kuko usanga hari aho yabaga yagiye ashya, ariko ntasubizweho ku buryo n’uwakwihisha byagora ku mubona.”

Yongeyeho ko bamaze kwandikira n’Umujyi wa Kigali bawusaba gushyira amatara kuri kaburimbo kugira ngo bifashe abanyerondo guhangana n’abo bagizi ba nabi.

Umuyobozi w’Akarere ka Gasabo, Rwamurangwa Stephen we avuga ko bane mu bakekwaho gutera ibyuma abaturage bamaze gutabwa muri yombi.

Umuvugizi wa Polisi mu Mujyi wa Kigali, CIP Emmanuel Kayigi yizeza abaturage ko iki kibazo kitazongera kugaragara muri uyu Murenge.

Yagize ati “Aho iki kibazo kimenyekaniye hafashwe ingamba dufatanyije n’inzego zibanze n’iz’umutekano kugirango tubihagarike kandi twizeye neza ko bizahagarara kandi bitazongera.”

Yasabye abaturage ubufatanye n’inzego z’umutekano, gutangira amakuru ku gihe no kumva ko umutekano nabo ubareba.

Uyu murenge wa Gatsata ugizwe n’utugari dutatu dufie abanyerondo 127, mu gihe utuwe n’abaturage barenga ibihumbi 38.





Tanga igitekerezo kuri iyi nkuru



Igitekerezo