Gasabo: Isoko rya wa musore wihangiye umurimo byarangiye barisenye-Video

Umusore witwa Rutazana Eric wihangiye umurimo ashinga kompanyi yise ’Zinduka Ukore Dushake Ahazaza hu Rwanda, Zudarwa Ltd ifite isoko rikorera mu Mudugudu w’Agatare mu Kagali ka Gasharu mu Murenge wa Kinyinya mu Karere ka Gasabo ryitwa Kinyinya Private Market, ubu ari mu gahinda gakomeye nyuma yuko inzego z’ubuyobozi zifashe umwanzuro wo kumusenyera isoko mu buryo we n’abaturage barikoreragamo bita akagambane k’umushoramari akoresheje imbaraga z’ifaranga.

Ku wa 18 Ugushyingo 2020 UMUBAVU twabagejejeho inkuru ivuga uburyo Rutazana Eric wihangiye umurimo mu butaka yasigiwe n’ababyeyi be avuga ko bishwe muri Jenoside yakorewe abatutsi muri Mata 1994 ashinja ubuyobozi bufatanyije n’umushoramari gushaka kumusubiza ku isuka nyamara bwirengagije imyanzuro bwari bwafashe ku kibazo cy’isoko rye.

Icyo gihe ubwo twageraga aho iri soko rikorera, yatubwiye ko hari hategerejwe umuyobozi wo ku rwego rw’Akarere ka Gasabo uza gutanga umwanzuro ku kuba iri soko ryakomeza gukora cyangwa ryahagarikwa gusa byarangiye ataje hatangwa undi munsi, ibyo uyu musore yavuze ko bitumvikana ukuntu uwo muyobozi ataje ntihanagaragazwe impamvu.

Ku mugoroba wo kuri uyu wa Kane tariki ya 26 Ugushyingo 2020, UMUBAVU wamenye amakuru ko isoko rya Rutazana Eric ryitwa Kinyinya Private Market riri gusenywa maze unyarukirayo usanga koko kurisenya birarimbanyije kandi bihagarikiwe n’igiporisi, abanyerondo na Agronome w’Umurenge wa Kinyinya.

Bamwe mu baturage bari bahafite ibibanza bacururizamo, bagaragarije UMUBAVU agahinda gakomeye bavuga uburyo ngo bitumvikana ukuntu ngo bahombeshwa na COVID-19 n’ubuyobozi bavuga ku bitanda bacururizagaho bamwe basanze byasenywe.

Umwe ati "Njyewe barampamagaye bambwira ko isoko bari kurisenya, nza nirukanka urabona ko nta n’imbaraga mfite (kuko atwite) igitanda cyanjye nakiguze ibihumbi 8 nzana imbaho nshyashya, nje nsanga nta kintu na kimwe gihari, kuki batabiteguje ko bazasenya isoko ngo nkureho n’izo mbaho ko amafaranga nacyubakishije ari ayo nagujije mu kimina".

Uyu uvuga ko yari amaze imyaka isaga umunani acururiza muri iri soko abajijwe niba batarabitegujwe, ati "Ku wa Mbere twarahacururije ntabwo ayo makuru jyewe nyazi, kuko iyo mba nyazi na mu gitondo nari kuza nkazana n’abantu bakakinkuriraho imbaho zanjye zari nzima".

Uyu kuba yaraje agasanga igitanda cye cyasenywe n’imbaho zacyo ntamenye aho zarengeye, ni ikibazo ahuje n’abandi baturage bari basanzwe bakorera muri iri soko, bagasaba ubuyobozi bw’Umurenge wa Kinyinya kubabonera imbaho zabo.

Undi na we uvuga ko yari amaze imyaka irenga 10 acururiza muri iri soko, ati "Hano nari narahashyize ibihumbi 50. Nari mfite igitanda gisakaye n’amabati mashyashya kinubatse neza. Ndaje nsanga nyine habaye nko muri 94, none rero turasa ngo ubuyobozi buturenganure buduhe ibyacu".

Aba baturage bose kandi bahuriza ku kua iri soko ryari ribafatiye runini kuko ngo ryari rinajyanye n’ubushobozi bwabo, ibituma badakozwa ibyo kujya gukorera mu isoko ry’umushoramari yise ’EDEN MARKET’ ryubatse mu wundi Mudugudu.

Iri soko rihagarariwe n’uyu musore Rutazana Eric ariko yakoranagamo n’urundi rubyiruko, avuga ko ryashinzwe nyuma yo kubona ko asoje amashuri ye akabona atategereza akazi ka leta dore ko na leta y’u Rwanda ihora ibishishikariza urubyiruko.

Uretse kuba iri soko rimaze igihe, Rutazana Eric avuga ko babifitiye n’ibyangombwa byo mu buyobozi nka RDB, ibyo avuga ko bakoze kugira ngo bakore bafite icyerekezo gifatika bitewe n’aho igihugu kigana.

Avuga ko kandi iri soko ryashinzwe ngo nyuma yo kubona ko abanyarwanda bakenera aho bacururiza ibicuruzwa byabo kimwe no guhaha, akavuga ko byari no gufasha igihugu kugira andi maboko byose bigamije iterambere ry’abanyarwanda muri rusange.

Rutazana Eric avuga ko iri soko ryishimiwe n’abaturage cyane dore ko ngo ribegereye cyane ku buryo umuturage bitamusaba kugenda urugendo rurerure ajya gucuruza cyangwa guhaha kandi n’imikoranire hagati yabo ikaba ari ntamakemwa.

UMUBAVU wamenye ko iri soko rye ryasenywe adahari aho yari yagiye kugeza ikibazo cye mu buyobozi butandukanye nyuma yo kugezwaho umwanzuro w’ikiswe kuryimura nyamara amakuru akamusanga iyo yagiye ko riri gusenywa.

Ubwo yahageraga ariko nabwo bwije yasanze, yaganiriye n’UMUBAVU avuga ko bitumvikana ukuntu abayobozi bazi neza amategeko bavogera umutungo we avuga ko ufite agaciro ka miliyoni 50 Frw.

Yavuze ko yifuza ko uwakoze ibi ahanwa, ati "Nkaba nibaza miliyoni 50 bashyize hasi bakazitwika nkaho amafaranga y’u Rwanda ari ibipapuro, ariyo mpamvu nifuza ko uwakoze ibi byose yahawa, agahanwa n’amategeko abiteganya igihe umutungo w’umuntu ubaye uvogerewe nyiri ubwite adahari".

Rutazana Eric asaba Minisiteri y’Ubutegetsi bw’Igihugu kumurenganura cyane ko ngo yari yaranayandikiye. Yavuze kandi ko ikibazo cye kitarangiriye aha yiteguye no kukigeza mu nkiko zikamurenganura.

Ati "Ntabwo ari aho birangiriye turatangiye kuko no mu rukiko turaza kugerayo".

Uwari ugararariye ubuyobozi ubwo isoko rya Rutazana Eric ryasenywaga, Agronome w’Umurenge wa Kinyinya, Muganineza Jimmy Frank yabwiye UMUBAVU ko ngo ibyakorwaga ari ukwirinda akajagari, icyemezo avuga ko cyafashwe nyuma yo guhura kw’inzego zitandukanye z’ubuyobozi harimo n’abayobozi ba kompanyi Zudarwa Ltd.

Yavuze kandi ko ngo biri gukorwa mu kwirinda ikwirakwizwa ry’icyorezo cya COVID-19, ati "Ni no kugira ngo twubahirize amabwiriza yo kwirinda COVID-19".

Abajijwe ku byagarutsweho n’abaturage batandukanye bavuga ko byakozwe batarabimenyeshejwe ngo babyitegure, ati "Ibyo ni ukwirengagiza kuko inzego zose twazigezeho, twakoze inama zitandukanye, ni abadashaka kubahiriza amabwiriza tuba twashyizeho nk’ubuyobozi".

Akomeza ati "Twakoze inama zitandukanye ku rwego rw’iri soko na kompanyi ihakorera nyuma yaho dukora inteko y’abaturage barabibwirwa ko bagomba kwimurwa ndetse ejobundi ku wa Gatanu twaranagarutse Akarere gatanga itangazo ko bagomba kwimuka bakava ahangaha".

Uyu avuga ko ngo iri soko ritari rifite gahunda, ngo ni iry’akajagari, ati "Ni mu kajagari, ni isoko ridafite gahunda, ni isoko ridafite na Toilette".

BYOSE UKO BYAGENZE ISOKO RYA RUTAZANA ERIC RISENYWA BIRI MURI IYI VIDEO:





Tanga igitekerezo kuri iyi nkuru



Igitekerezo
Jean Bosco Kuya 28-12-2020

Ese Rutazana haba hari ubufasha bundi wahawe?

Rutazana Eric Kuya 27-12-2020

Turasaba ko mwaza subira kureba icyo ubuyobozi bwaba bwarafashije uwasenyewe Isoko nkumuntu wari bashije kwihangira umurimo ngo yiteze imbere aho gutega amaboko

Rutazana Eric Kuya 27-12-2020

Hari ibibazo abaturage bahura nabyo bakabura kirengera kubera uburyo inzego zibanze zubatse kuko usanga uburyo zubatse abayobozi batwikira amakosa yabangenzi babo babayobozi hanyuma rubanda bakabirenganiramo kuko abayobozi badashobora kuvuguruzanya; twakwita ko ibitekerezo by’abaturange ntajambo ahubwo umuyobozi ariwe wica agakiza igihe cyose umuturage igihe atagira ijambo mubimukorerwa.

Rutazana Eric Kuya 27-12-2020

Hari ibibazo abaturage bahura nabyo bakabura kirengera kubera uburyo inzego zibanze zubatse kuko usanga uburyo zubatse abayobozi batwikira amakosa yabangenzi babo babayobozi hanyuma rubanda bakabirenganiramo kuko abayobozi badashobora kuvuguruzanya; twakwita ko ibitekerezo by’abaturange ntajambo ahubwo umuyobozi ariwe wica agakiza igihe cyose umuturage igihe atagira ijambo mubimukorerwa.

S Kuya 28-11-2020

Agahinda k’abaturage kagera Ku Mana vuba