Ethiopia-Tigray: Impande zombi zirashinjanya ubwicanyi ku basivile

Umuryango Mpuzamahanga Uharanira Uburenganzira bwa Muntu, Amnesty International watangaje ko wabonye amashusho y’icyogajuru yerekana ubwicanyi ku basivile "mirongo niba atari amagana biciwe mu gace ka Tigray" mu ntambara iri kuba muri iyi leta iri mu majyaruguru ya Ethiopia.

Uruhande rwa leta y’igihugu n’urwa leta y’akarere ka Tigray zose zirashinjanya ubwo bwicanyi.

Ubwo bwicanyi bivugwa ko bwabaye ku wa Mbere, nibwo bwa mbere butangajwe bwakorewe abasivile kuva iyi mirwano yatangira mu cyumweru gishize.

Bamwe mu batangabuhamya bavuze ko bwakozwe n’abasirikare bo ku ruhande rw’ishyaka TPLF ritegeka leta ya Tigray, gusa ibi aba babihakanye.

Kubona amakuru y’ibiri kubera muri aka gace birakomeye kuko imirongo ya Telephone na Internet byose byakuweho.

Abaturage babarirwa mu bihumbi bamaze guhungira mu gihugu gituranyi cya Sudan, nk’uko abategetsi muri icyo gihugu babitangaje.

Itangazo rya Amnesty International mu ijoro ryo ku wa Kane, rivuga ko uyu muryango wagenzuye amashusho y’icyogajuru, ukabona abantu bariho bicwa batewe ibyuma cyangwa batemwe mu mujyi wa Mai-Kadra muri Tigray.

Ivuga kandi ko yagenzuye amashusho n’amafoto y’imirambo myinshi y’abantu yajugunywe ahatandukanye muri uwo mujyi, iri kuvanwa aho inyanyagiye.

Amnesty ivuga ko abishwe biboneka ko ari abasivile batari mu mirwano.

Minisitiri w’Intebe wa Ethiopia Abiy Ahmed yashinje abasirikare ba leta ya Tigray ubwo bwicanyi bwo ku wa Mbere.

Muri Video yatangaje kuri Facebook, Bwana Ahmed yavuze ko ingabo za leta zafashe igice cy’uburengerazuba bwa Tigray, zikahavana ingabo z’ishyaka rya TPLF.

Abategetsi ba leta ya Tigray bo bahakanye bivuye inyuma ko ingabo zabo ari zo zakoze ubwo bwicanyi bwavuzwe na Amnesty.


Ingabo za leta ziri mu ikamyo zerekeje mu mirwano n’ingabo za TPLF muri leta ya Tigray





Tanga igitekerezo kuri iyi nkuru



Igitekerezo