Ethiopia: Rokete zarasiwe muri Tigray zaguye muri Eritrea

Perezida w’akarere ka Tigray ko mu majyaruguru ya Ethiopia yavuze ko ku wa Gatandatu nijoro ingabo zako zarashe ibisasu bya Rokete ku kibuga cy’indege cyo muri Eritrea, ibi bikaba byongereye ahabera imirwano muri aka karere.

Perezida Debretsion Gebremichael yashinje ingabo za leta ya Ethiopia kwifashisha icyo kibuga cy’indege mu kugaba ibitero kuri leta ya Tigray.

Mu butumwa bwo kuri Twitter, Minisitiri w’Intebe wa Ethiopia Abiy Ahmed yabaye nk’uhakana ko ingabo zayo zirimo gukorana n’iza Eritrea, avuga ko Ethiopia "ifite ubushobozi burenze ubucyenewe bwo kugera ku ntego z’iki gikorwa cya gisirikare yo ubwayo".

Ariko icyo gitero ku kibuga cy’indege cyo muri Eritrea kirimo kubonwa nk’igikajije kurushaho iyi mirwano imaze iminsi 12 hagati y’ingabo za leta ya Ethiopia n’ishyaka riri ku butegetsi muri leta ya Tigray.

Ishyaka riri ku butegetsi muri leta ya Tigray ryari ryakangishije ko rizagaba igitero kuri Eritrea.

Mbere yaho, ingabo zo muri iyi leta zari zarashe ibindi bisasu bya rokete mu kandi karere ka Ethiopia.

Tigray People’s Liberation Front (TPLF) yavuze ko ku wa Gatanu yarashe ahantu habiri ho muri leta ya Amhara na yo ni imwe mu zigize Ethiopia ndetse iburira ko izagaba ibindi bitero.

Ubushyamirane hagati ya TPLF na leta ya Ethiopia bwarushijeho kwiyongera mu kwezi gushize.

Mu myaka igera kuri 20 ishize, Eritrea yarwanye na Ethiopia, intambara isozwa n’amasezerano y’amahoro yemeranyijweho mu mwaka wa 2018.

Imirwano muri Tigray yanagize ingaruka kuri Sudan, ahamaze guhungira abaturage b’abasivile batari munsi ya 17,000, nkuko Umuryango w’Abibumbye (ONU/UN) ubitangaza.

Ni iki cyabaye muri Eritrea?

Ku wa Gatandatu nijoro, abatuye mu murwa mukuru Asmara batangaje ko bumvise ibintu biturika cyane, mu gihe havugwaga amakuru yuko ibisasu bya rokete birimo kugwa hafi y’ikibuga cy’indege cyo muri uwo mujyi. Kugeza ubu nta bantu baratangazwa baguye muri iki gitero.

Abategetsi ba Tigray banashinje ingabo za Eritrea kwambuka umupaka zikinjira muri Ethiopia gufasha ingabo za leta ya Ethiopia mu mirwano.

Ibiro Ntaramakuru Reuters bisubiramo amagambo ya Bwana Debretsion, umutegetsi wa Tigray, avuga ko mu minsi micye ishize ingabo ze zarwanye n’ibico (divisions) 16 by’ingabo za Eritrea mu ngamba z’ahantu henshi.

Nubwo leta ya Eritrea yahakanye kugira uruhare urwo ari rwo rwose muri iyo mirwano, umunyamakuru wa BBC Will Ross avuga ko kuba hari amakuru y’imirwano ku mupaka, ndetse n’amakuru yuko abasirikare barimo kuvurirwa mu bitaro byo muri Eritrea, bica amarenga ko ibitandukanye n’ibyo Eritrea ivuga ari byo kuri.

Abagabo babiri bahuje umwanzi

Isesengura rya Will Ross, umunyamakuru wa BBC

Mu gihe ibisasu birimo kuraswa muri Eritrea, iyi mirwano ubu yamaze gukara cyane kurushaho ndetse birashoboka ko byagorana cyane kuyihagarika. Ingaruka zayo ubu zishobora guteza umutekano mucye muri aka karere kose k’ihembe ry’Afurika.

Ariko abantu benshi bakurikiranira hafi ibyaranze politike yo mu gihe cya vuba gishize muri aka karere, bari baraguje umutwe ko intambara irimo gututumba ubwo Minisitiri w’Intebe wa Ethiopia Abiy Ahmed yahindukaga inshuti y’umutegetsi w’umunyagitugu wa Eritrea, Isaias Afwerki.

None ubu aba bagabo babiri bafite umwanzi umwe abanyapolitike bari ku butegetsi muri Tigray, bamaze imyaka ari bo bategeka Ethiopia mbere yuko Bwana Abiy agera ku butegetsi mu 2018, harimo no mu gihe Ethiopia yari irimo irwana na Eritrea mu ntambara yo ku mupaka yahitanye ababarirwa mu bihumbi za mirongo.

Kugeza ubu ubusabe bw’amahanga bwuko habaho ibiganiro hagati y’impande zombi bwarirengagijwe, mu gihe abaturage b’abasivile babarirwa mu bihumbi bakomeje guhunga imirwano berekeza mu gihugu gituranyi cya Sudan.


Umugore w’umunya-Ethiopia wahunze imirwano ikomeje kuba muri Tigray, akikiye umwana mu cyaro cya Hamdait ku mupaka wa Sudan na Ethiopia muri leta ya Kassala yo mu burasirazuba bwa Sudan, ku itariki ya 14/11/2020

KARASIRA AIMABLE ASOBANUYE NEZA INKOMOKO Y’INDIRIMBO "SHIKARETE", UGASANGA BARI KUKUBWIRA NGO URIYA UMWIRINDE:





Tanga igitekerezo kuri iyi nkuru



Igitekerezo