Ese abanyamadini bazatinyuka kwerura bigishe  ubuzima bw’imyororokere  mu nsengero?

Nyuma y’aho hagaragajwe ko ikibazo cy’abangavu baterwa inda zidateguwe kiri ku muvuduko uhambaye, Leta y’u Rwanda yitabaje abanyamadini kugira ngo bayifashe mu rugamba rwo guhangana n’iki kibazo binyuze mu gutanga nyigisho zihoraho zijyanye n’ubuzima bw’imyororokere mu nsengero.

Ubwo kuri uyu wa 31 Knama 2018, abanyamadini basobanurirwaga itegeko rigenga ubuzima bw’imyororokere y’abantu, bagaragarijwe uburemere bw’ikibazo n’ingaruka gifite ku muryango nyarwanda, bahabwa inshingano zo kutagenda biguruntege mu kukivugutira umuti.

Muri bimwe aba banyamadini bahawemo umukoro harimo Kuganiriza abana ibijyanye n’ubuzima bw’imyororokere, gukangurira abayoboke babo kuboneza urubyaro hakoreshejwe uburyo butandukanye, gusobanura neza amategeko agenga gukuramo inda n’ibindi.

Ibi ngo bizatuma abayoboke b’amadini bahindura imyumvire ku bijyanye n’ubuzima bw’imyororokere cyane ngo kuri ubu Abanyarwanda basaga 90% babarizwa mu matorero n’amadini atandukanye.

Rwabuhihi Rose, Umuyobozi w’ikigo gishinzwe kugenzura iyubahirizwa ry’ihame ry’uburinganire yavuze ko atumva impamvu serivisi z’ubuzima bw’imyororokere zigifatwa nk’ibanga.

Yagize ati “nubwo igihugu cyacu cyashyizeho ingamba zijyanye n’ubuzima bw’imyororokere, turacyahura n’imbogamizi zitari nkeya, twizera ko muri iyi nama yanyu, muri bugerageze kwigaho mukadufasha, turebe ukuntu twazikemura, turebe ukuntu igihugu cyacu twagifasha kugira ngo abanyarwanda bagire ubuzima bwiza, budafite indwara zitari ngombwa n’ibindi bibabuza gutera imbere,”
Yavuze ko kimwe mu bidindiza imyumvire y’abaturage ari ukugira amakuru Atari yo ku muhindagurikire y’ubuzima bw’imyororokere nk’uko byagaragajwe n’ubushakashatsi.
Yakomeje agira ati “Ayo makuru rero ntabwo ari ikintu kigoye kumenya ntabwo bisaba kwiga ubumenyamuntu buhanitse muri za kaminuza, ni ibintu twese dushobora kumenya, dufite inararibonye nyinsho zishobora kudufasha kugira ngo tubyumve neza, turebe natwe icyo twabikoraho kugira ngo tugire ubuzima bwiza,
Ati “ikindi ubushakashatsi bwerekanye ni uko serivisi zijyanye n’ubuzma bw’imyororokere zigifatwa nk’ibanga, ugasanga ukeneye serivisi iyo ari yo yose, yaba umugore yaba umugabo, yaba uri mu rubyiruko ufite imyaka ihagije, ugasanga arabihabwa na mugenzi we, arabihabwa n’udakwiriye kubimuha, utanareba na neza agahabwa n’amakuru Atari yo,”

Bishop John Rucyahana, umuyobozi w’ihuriro ry’amadini n’amatorero mu Rwanda yasabye abanyamadini kuzafata undi mwanya uhagije bakanakora ubushakashatsi bwimbitse ku kibazo cy’ubuzima bw’imyororokere kugira ngo abana badakomeza kwangirika barebera.

Tom Mulisa, Umuyobozi uharanira uburenganzira bwa muntu mu karere k’ibiyaga bigari (GLIHD) yavuze ko amategeko agenga ubuzima bw’imyororokere ahari ariko atubahirizwa uko bikwiye.

Ati “icyo itegeko twariganiragaho ni uko ari itegeko rijyanye n’ubuzima bw’imyororokere, murabizi ko muri iyi minsi dufite ibibazo by’abana batwita bakiri bato, (young-mothers), ababyarira mu rugo, urubyiruko baterwa inda batateguye, akaba ari yo mpamvu rero twabonye….amategeko arahari, amategeko aha n’inshingano umubyeyi zo kuganiriza umwana ku buzima bw’imyororokere, amategeko yereka n’umwana uburyo bwo kuboneza urubyaro, n’amategeko yereka umwana uburyo bwo kwirinda inda zitateguwe, ariko ukabona ntibirimo gukorwa, akaba ari yo mpamvu twavuze ngo twifashishe abanyamadini, amadini agira inyigisho zigera kuri bose, hejuru ya 90 ku ijana by’abanyarwanda bagira amadini babarizwamo,”

Ikigo cy’igihugu cy’ubuzima RBC kivuga ko abayobozi b’amadini n’amatorero bafite uruhare runini mu guhindura imyumvire ku bayoboke bayo mu bijyanye n’ubukangurambaga ku buzima bw’imyororokere ariko ngo ibi ntibyagerwaho nabo batarabisobanukirwa.

RBC igaragaza ko bimwe mu bibazo bidindiza izi gahunda ari amategeko atajyanye n’igihe azigenga kandi avuguruzanya, amavuriro adashyigikira zimwe muri gahunda zo kuboneza urubyaro,umuco, ndetse abatarahindura imyumvire mu nzego zitandukanye mu Rwanda, ikibazo cy’ababyeyi by’umwihariko, abana babakobwa bakuramo inda bwihishwa aho buri mwaka abagera ku bihumbi 60 bamenyekana nabwo byabagizeho ingaruka.

Umubavu.com





Tanga igitekerezo kuri iyi nkuru



Igitekerezo