Kuri uyu wa Gatanu tariki ya 16 Ukwakira 2020, Dr Pierre Damien wigeze kuba Minisitiri w’Intebe w’u Rwanda ukurikiranyweho ibyaha birimo ubuhemu, urubanza rwe rwatangiye kuburanishwa mu mizi, we n’abamwunganira mu mategeko basaba ko uru rubanza rwaburanishwa n’Abacamanza batatu kubera ko ngo ari urubanza rukomeye.

Uru rubanza ruri kuburanishwa n’Urukiko rw’Ibanze rwa Nyarugenge. Iburanisha ryo kuri uyu wa Gatanu ryabaye hifashishijwe ikoranabuhanga ry’iya kure, Dr Pierre Damien uregwa akaba yari ari aho afungiye kuri Gereza ya Nyarugenge ya Mageragere mu gihe Inteko y’Urukiko yo yari iri ku cyicaro cyarwo i Nyamirambo.

Inteko igizwe n’Umucamanza umwe n’umwanditsi w’Urukiko binjiye mu cyumba cy’iburanisha ku isaha ya saa tatu za mu gitondo, uruhande rw’uregwa ruhita rutanga inzitizi zibanziriza uru rubanza rwo mu mizi.

Me Kayitare Jean Pierre umwe mu banyamategeko bunganira Dr Damien yabwiye Umucamanza ko kubera imiterere y’uru rubanza, uruhande rw’uregwa rwifuza ko rwaburanishwa n’abacamanza batatu ngo kuko uru rubanza ari runini.

Dr Pierre Damien yabajijwe icyo avuga ku cyifuzo cy’umunyametegeko umwunganira, yavuze ko agishyigikiye ndetse ko ari na we wagitanze.

Ubushinjacyaha bwo buvuga ko iki cyifuzo kidafite ishingiro kuko uruhande rw’uregwa rutigeze rukigaragaza mbere kandi ibiriho biburanwaho ngo ubu byose byagiye bigaragazwa mbere.

Me Bayisabe Ernest na we wunganira uregwa, yahise abwira Umucamanza ko ibyo basabira Dr Damien Habumuremyi byemewe n’amategeko by’umwihariko bikaba bigenwa n’Itegeko ryerekeye imiburanishize y’imanza mbonezamubano.

Izi mpaka zamaze isaha imwe, Umucamanza yahise yanzura ko urubanza rusubikwa kugira ngo Urukiko ruzasuzume kiriya cyifuzo cy’uregwa, yimurira urubanza tariki ya 30 Ukwakira 2020.

Dr Pierre Damien wari usanzwe ari Umuyobozi Mukuru w’Urwego rushinzwe Intwari, imidari n’impeta by’ishimwe, akurikiranyweho icyaha cy’ubuhemu no gutanga Sheki itazigamiwe.

Me Kayitare Jean Pierre we yamwunganiye ari ku rukiko naho Me Bayisabe Ernest we yari ari kuri Gereza ya Nyarugenge

Uko byari byifashe mu cyumba cy’Iburanisha

Iburanisha ryo kuri uyu wa Gatanu ryabaye hifashishijwe ikoranabuhanga ry’iya kure

Noneho Leta yivanze mu kibazo cya wa musaza ufite ifoto imanitse ku Rwibutso rwa Jenoside rwa Kigali ruri Gisozi, uwunganira Paul Rusesabaginawo mu Bubiligi avuga uko yangiwe kumugeraho aho afungiye:

---

---