Didier Drogba na we yakiriwe na Perezida Kagame bagirana ibiganiro-Amafoto

Nyuma ya myugariro wa Arsenal, David Luiz, umunya-Côte d’Ivoire, Didier Yves Drogba Tébily na we yakiriwe na Perezida Kagame muri Village Urugwiro bagirana ibiganiro.

Didier Drogba ari mu Rwanda nk’umwe mu bagejeje ibiganiro ku Nama Nyafurika y’Urubyiruko izwi nka ‘YouthConnekt Africa Summit 2019’.

Nubwo aheruka gusezera ku gukina umupira w’amaguru, uyu mugabo azahora yibukwa nk’umwe mu bihangange muri ruhago kuri uyu mugabane. Yatumiwe muri YouthConnekt mu nshingano arimo nka Ambasaderi w’Ishami ry’Umuryango w’Abibumbye ryita ku iterambere, UNDP.

Didier Yves Drogba Tébily w’imyaka 41 wanditse amateka muri Chelsea FC yo mu Bwongereza, yashinze umuryango The Didier Drogba Foundation utanga ubufasha bw’amikoro n’ibikoresho mu nzego z’uburezi n’ubuzima mu bihugu bitandukanye bya Afurika. Mu mwaka ushize uyu muryango wafunguye ishuri mu gihugu cye cya Côte d’Ivoire, ari naryo rya mbere wubatse.

Mu kiganiro yatanze muri YouthConnekt kuri uyu wa Kane, Drogba yasangije urubyiruko urugendo yanyuzemo ubwo yasigaga nyina muri Côte d’Ivoire akajya gukina umupira w’amaguru mu Bufaransa, aho yavuye akomereza muri Chelsea FC yagiriyemo ibihe byatumye aba igihangange.

Avuga ko yagiye ahura n’inzitizi zirimo imvune n’ibindi, ariko akagumana ku mutima intego yo ‘kuba ku isonga’. Aha niho yahereye abwira urubyiruko ko rugomba kugira indoto, kwigirira icyizere, ishyaka, gukora ibyo rukunda byose bigaherekezwa no gukora cyane.

Ati “Tugomba kugira inzozi, ishyaka no gukora cyane kuko kugera ku byiza bisaba gukora cyane. Nagiye muri Chelsea kuko bari bamfitiye icyizere, hari benshi beza bari kugura ariko nabonye ayo mahirwe nyabyaza umusaruro”.

Yashishikarije urubyiruko kujya hanze rugiye guhaha ubumenyi, rukagaruka rugashora imari mu bihugu byarwo, umugabane warwo rukawuzamura.

Drogba yabaye kapiteni wa Côte d’Ivoire ndetse yayitsindiye ibitego byinshi kurusha undi mukinnyi uwo ari we wese. Yanabaye umukinnyi w’umwaka muri Afurika inshuro ebyiri zitandukanye, hagati ya 2006 na 2009.


Perezida Kagame aramutsa Didier Drogba mbere y’ibiganiro bagiranye muri Village Urugwiro


Perezida Kagame yagiranye ibiganiro na Didier Drogba n’itsinda bari kumwe, nyuma yo kwitabira YouthConnekt


Drogba yashimye intambwe u Rwanda rugezeho

Kanda hano urebe video utasanga ahandi





Tanga igitekerezo kuri iyi nkuru



Igitekerezo