Covid-19 mu mfungwa mu Rwanda, abanduye barenze 1,000

Kuva icyorezo cya COVID-19 kigaragaye ku butaka bw’u Rwanda ku wa 14 Werurwe 2020, ni inshuro ya mbere habonetse abanduye benshi ku munsi umwe aho kuri uyu wa Mbere tariki ya 29 Kamena 2020, Minisiteri y’Ubuzima (MINISANTE) yatangaje ko abanduye iki cyorezo ubu bageze ku 1,001 mu gihe kuri uyu munsi wonyine habonetse abanduye 101.

Abanduye bashya babonetse mu bipimo 2,498 byafashwe kuri uyu wa Mbere, barimo abafungwa 72 bo mu Karere ka Ngoma, ni bwo bwa mbere iki cyorezo kivuzwe ahafungirwa abantu mu Rwanda.

MINISANTE ivuga ko abo bafunze banduye bifitanye isano n’abamaze iminsi batangazwa banduye bo mu gace ka Rusumo kari ku mupaka w’u Rwanda na Tanzania.

Kuri Twitter, umuvugizi w’inzego z’amagereza mu Rwanda, Hilary Sengabo, yasubije Minisiteri y’Ubuzima asa n’usobanura ko abanduye bavugwa atari abo mu magereza.

Yanditse ati "Iri tsinda ry’abagororwa muvuga aha, nizere ko habayeho kwibeshya mu inyito ngirango mwashatse kuvuga abafungwa bakiri muri za Cashot za Police atari Gereza".

Dr Nsanzimana Sabin ukuriye ikigo cy’ubuzima (RBC) mu Rwanda nyuma yatangaje ko abo bantu ari abafungiye muri ’Cachot’ za Polisi.

Mu bwandu bushya bwagaragaye ejo harimo 22 bo mu mujyi wa Kigali. Ni mu gihe uduce tumwe ku musozi wa Gikondo n’uwa ’Mont Kigali’ duherutse gusubizwa mu ngamba za ’guma mu rugo’ (Lockdown).

Bwana Nsanzimana Sabin yatangarije igitangazamakuru cya leta RBA ko mu banduye bashya babonetse i Kigali kimwe cya Kabiri babonetse muri utu duce turi mu kato.

Kuva iki cyorezo cyatangazwa mu Rwanda tariki 14 z’ukwezi kwa Gatatu, umubare munini w’abanduye Covid-19 ku munsi wari warabonetse ku wa mbere w’icyumweru gishize ahabonetse abanduye 59, muri bo 33 bari ab’i Kirehe.

Mu minsi irindwi ishize mu Rwanda habonetse abantu 214, biganjemo abo mu bice bya Rusumo na Kirehe mu burasirazuba bw’u Rwanda, hamwe na Rusizi mu burengerazuba.

Leta y’u Rwanda yazamuye ubushobozi bwo gupima iyi ndwara aho kuva tariki 14 z’uku kwezi bwa Gatandatu ku munsi hafatwa ikigereranyo cy’ibipimo hagati ya 3,000 na 4,000.

Kuva tariki 14 z’uku kwezi, Minisiteri y’Ubuzima igaragaza ko hafashwe ibipimo byose hamwe 52,593 muri byo habonetse abanduye 460.

Biteganyijwe ko ejo taiki 01 z’ukwezi kwa Karindwi Leta y’u Rwanda itangaza izindi ngamba, ugereranyije n’iziriho, mu kurwanya iki cyorezo.


I Gikondo mu gace ka Bwerankori mu cyumweru gishize hafashwe ibipimo ku bantu benshi

Minisitiri Gatete mu iperereza kuri ruswa, Trump ashobora gutabwa muri yombi, umusaza wishwe aragiye inka ze na zo zikaburirwa irengero n’izindi nkuru utapfa gusanga ahandi uretse k’UMUBAVU TV ONLINE:





Tanga igitekerezo kuri iyi nkuru



Igitekerezo