Covid-19: Berlusconi mu bitaro, amakuru avugwa n’ahandi…

Silvio Berlusconi wahoze ari minisitiri w’intebe w’u Butaliyani yaraye mu bitaro mu mujyi wa Milan ngo yitabweho nyuma y’uko bamusanzemo Coronavirus.

Ishyaka rye Forza Italia rivuga ko uko amerewe bidateye impungenge, ko "ameze neza".

Berlusconi w’imyaka 83 washoye imari mu itangazamakuru, we na babiri mu bana be kuwa gatatu babasanzemo iki cyorezo bavuye mu biruhuko i Sardinia, hamwe mu higanje ubwandu mu Butaliyani.

Berlusconi n’umukunzi we Marta Fascina w’imyaka 30, bari bamaze iminsi mu kato ka bonyine mu rugo rwabo nyuma y’ibiruhuko bavuyemo i Sardinia.

Ishyaka rye rivuga ko "kumushyira mu bitaro by’igihe gitoya byari bikenewe ngo bakurikirane iyi virus, ariko ameze neza".

Imibare y’abanduye mu Butaliyani iri kuzamuka, mu ijoro ryo ku wa Kane hatangajwe abantu bashya 1,397 banduye na 10 bapfuye.

New Zealand: Hapfuye umuntu wa mbere kuva mu kwa Gatanu

Muri New Zealand mu gitondo cyo kuri uyu wa Gatanu batangaje ko habonetse umuntu wa mbere wishwe na Covid-19, ni we wa mbere iyi ndwara yishe kuva mu kwezi kwa Gatanu.

Ni umugabo wo mu kigero cy’imyaka 50, yapfuye nyuma y’iminsi ari kuvurirwa mu ndembe nk’uko minisiteri y’ubuzima yaho ibivuga.

New Zealand yashimwe n’amahanga uko yarwanyije iki cyorezo hakiri kare ikagera aho imara iminsi 100 nta wanduye Covid-19 barabona mu gihugu.

Auckland, umujyi munini w’iki gihugu, niho hongeye kuboneka abantu bagera ku 100 banduye mu byumweru bicye bishize, kuri uyu wa Gatanu habonetse batanu.

Andi makuru avugwa ahandi:

- Muri Brazil abanduye Covid-19 babonetse ubu bamaze kurenga miliyoni enye, gusa imibare y’abo yica ku munsi yageze ku gipimo cyo hasi cyane kuva mu mezi atatu ashize.

- Brazil ni igihugu cya Kabiri mu bantu banduye iyi ndwara nyuma ya Amerika, ariko u Buhinde bushobora gufata uwo mwanya kuko hamaze kuboneka abanduye miliyoni 3.94

- Perezida Donald Trump wa Amerika yaneguye mukeba we Joe Biden kwambara agapfukamunwa cyane ariko yajya kuvuga ijambo akakigizayo kakanagana ku gutwi. Avugira i Pennsylvania imbere y’abantu benshi barimo bacye bambaye udupfukamunwa yagize ati "Mwari mwabona umugabo ukunda agapfukamunwa nka we?"

- Mu Rwanda haraye hatangajwe umuntu wa 18 wishwe na Covid-19, ni umuntu wa munani mu gihe cy’ibyumweru bibiri birengaho gato wishwe n’iki cyorezo. Hamaze gutangazwa abarenga 4,200 bayanduye.

- Mu Burundi imibare iheruka gutangazwa ni iyo ku itariki 29 z’ukwezi gushize kwa munani ahari habonetse abantu bashya 15 banduye Covid-19, bose hamwe ni 445.

- Muri Afurika hamaze gutangazwa abantu 1,275,863 banduye iki cyorezo kuva cyahagera mu kwezi kwa Gatatu, muri bo 30,617 barapfuye naho abarenga miliyoni imwe baragikize nk’uko ikigo gishinzwe kurwanya ibyorezo cy’ubumwe bwa Afurika kibitangaza.


Berlusconi arazwi cyane muri politiki y’Ubutaliyani mu myaka ya 1990

Abaturage bakoze imyigaragambyo bamwe barafungwa, Amerika yasabye u Rwanda gufata Rusesabagina ’kimuntu’ n’andi makuru menshi utapfa gusanga ahandi, sura UMUBAVU TV ONLINE:





Tanga igitekerezo kuri iyi nkuru



Igitekerezo