Côte d’Ivoire: Umudepite yakatiwe igifungo azira gutangaza ibinyoma kuri Twitter

Umudepite wo muri Côte d’Ivoire yakatiwe igifungo cy’umwaka umwe no gutanga amande angana n’amadolari 520 ya Amerika kubera gukwirakwiza amakuru y’ibinyoma no kugumura rubanda ngo ikore ibikorwa by’urugomo.

Nkuko bitangazwa n’ishami rya BBC ritangaza amakuru mu rurimi rw’Igifaransa rya BBC Afrique, Depite Alain Lobognon yatangaje ubutumwa ku rubuga nkoranyambaga rwa Twitter ku itariki ya 9 y’uku kwezi kwa mbere avuga ko umushinjacyaha mukuru afite gahunda yo gutegeka ko undi mudepite atabwa muri yombi.

Ariko umushinjacyaha yarabihakanye, avuga ko ubwo butumwa bwo kuri Twitter bwateje imyigaragambyo.

Uwunganira Bwana Lobognon mu mategeko yavuze ko umukiliya we azajurira iki cyemezo cy’urukiko.

Yongeyeho ko umukiliya we ari kwibasirwa kubera ko ari inshuti ya hafi ya Guillaume Soro, wahoze ari umukuru w’inyeshyamba akaba yaranahoze ari minisitiri w’intebe, kuri ubu akaba ari umukuru w’inteko ishingamategeko.

Mu bihe bishize bya vuba, umubano hagati ya Bwana Soro na Perezida Alassane Ouattara wa Côte d’Ivoire wajemo igihu, mu gihe hitegurwa amatora ya Perezida ateganyijwe kuba mu mwaka utaha wa 2020.

PNG - 506.2 kb
Byitezwe ko Bwana Lobognon w’imyaka 50 y’amavuko, ajuririra iki cyemezo cy’urukiko

@Umubavu.com





Tanga igitekerezo kuri iyi nkuru



Igitekerezo