Coronavirus yageze mu baturanyi muri RDC

Umurwayi wa mbere wa Coronavirus yagaragaye mu mugi wa Kinshasa muri Repubulika Iharanira Demukarasi ya Congo, bikaba byemejwe kuri uyu wa 10 Werurwe 2020 nyuma y’ibyavuye mu kizamini.

Radiyo Okapi yatangaje aya makuru yahamirijwe na Minisitiri w’Ubuzima w’iki gihugu, Dr. Eteni Longondo, ivuga ko uyu murwayi yageze i Kinshasa aturutse mu Bubiligi, akaba yarahise ashyirwa mu kato.

Minisitiri Longondo ati “Ni umunyamahanga waturutse mu Bubiligi, wamenyekanye ageze ku butaka nyuma aza gusuzumwa. Byaje kugaragara ko afite Coronavirus n’ubwo yavuye mu Bubiligi asa n’aho ari muzima.”

Ikigiye gukurikiraho nk’uko Minisitiri Longondo abivuga, ni ugupima abantu bari kumwe n’uyu murwayi, bashyirwe mu kato kugira ngo batanduza n’abandi.

Avuga ko uyu murwayi ubu ari kuvurirwa mu kigo cyahoze gikurikirana abarwayi ba Ebola cyahinduwe icyo gukurikirana abakekwaho Coronavirus kiri mu burasirazuba bw’umujyi wa Kinshasa.

DR Congo ifite ibibuga by’indege bine bikoreshwa cyane, kuri byo hongerewe uburyo bwo gusuzuma umuriro abinjira, uburyo bwanakoreshwaga mu gihe gishize havugwa Ebola.

Bwana Longondo yasabye Abanyekongo kudakangarana, ahubwo "bafata ingamba z’isuku, kutegera umuntu ukorora, gukaraba intoki kenshi no kwivuza igihe bumvise ibimenyetso".

Repubulika Iharanira Demukarasi ya Congo ibaye igihugu cya 11 muri Afurika kigaragayemo umurwayi wa Coronavirus. Abamaze kwandura iki cyorezo muri ibi bihugu byose barenga gato 100.

Ni mu gihe kandi ku Isi yose, abantu barenga 113,000 bamaze kwandura, abakabakaba 4000 bakaba bamaze gupfa.

Abarenga 100 ubu bamaze kwandura Coronavirus muri Africa:

- Misiri - 55
- Algeria - 20
- Africa y’Epfo - 7
- Tunisia - 5
- Senegal - 4
- Morocco - 2
- Cameroun - 2
- Burkina Faso - 2
- Nigeria - 2
- Togo - 1
- Congo Kinshasa - 1


Ministiri Longondo yatangaje ko uyu muntu w’umugabo, yageze mu gihugu agaragara nk’udafite ikibazo cy’ubuzima

Kizito Mihigo yari yarabwiye Ingabire Victoire imigambi ye, yatubwiye ikimuri ku mutima muri iyi Video utapfa gusanga ahandi:





Tanga igitekerezo kuri iyi nkuru



Igitekerezo