Coronavirus, isazi ku mutwe wa Pence: Bimwe mu byaranze ikiganiro cya Harris na Pence  abantu  barikanga

Ikiganiro mpaka kuri televiziyo hagati y’abakandida ku mwanya wa visi perezida wa Amerika mu matora yo mu kwezi gutaha cyaranzwe n’impaka zikomeye kuri coronavirus.

Umudemokarate Kamala Harris yashinje Donald Trump "ubutegetsi bubi bwabayeho kurusha ubundi bwose" mu mateka.

Umurepubulikani Mike Pence usanzwe kuri uyu mwanya wa visi perezida, yavuze ko gahunda y’abademokarate kuri iki cyorezo "ari iyo bakoporoye" atari iyabo.

Iki cyari ikiganiro cy’abantu b’abahanga mu itumanaho no gutanga ingingo zabo, cyari gitandukanye n’icyabaye mu cyumweru gishize hagati ya Bwana Trump na Bwana Biden cyageze aho bo batukana.

Bwana Pence ntabwo yaciye mu ijambo mukeba we kenshi nk’uko Trump yabikoze mu cyumweru gishize. Ubwo yabikoraga, Madamu Harris yahise amubwira ati: "Bwana visi perezida, ni njye uri kuvuga."

Muri rusange agace k’iki kiganiro cyo ku wa gatatu nijoro kakwiriye henshi kakanavugwaho cyane, ni ubwo isazi yazaga ikagwa ku mutwe wa Bwana Pence, ikamugumaho iminota igera kuri ibiri.

Umwe yanditse kuri Twitter ati: "Isazi ni yo igaragaza uzatsindwa amatora". Agaragaza indi yigeze kujya kuri Madamu Hillary Clinton.

Mu kiganiro cy’iminota 90 cyabereye muri Kaminuza ya Utah mu mujyi wa Salt Lake City, Madamu Harris yashinje Bwana Pence na perezida kubeshya nkana Abanyamerika ku bukana bw’iki cyorezo.

Ati: "Bari babizi ariko barabihisha," mbere yo kongeraho ko byari ku mpamvu zo "kugira ngo bazongere batorwe".

Bwana Pence yashinje ukwiyamamaza kwa Biden na Harris kwigana umugambi wa White House ku kurwanya iki cyorezo.

Aha yibutsaga ko ubwo Biden yiyamamarizaga kuba perezida mu 1987 yakoporoye ijambo rya Neil Kinnock wari umukuru w’ishyaka rya Labour mu Bwongereza.

Madamu Harris yabajijwe n’uwari uyoboye ikiganiro niba azafata urukingo ruzemezwa rwa Covid-19 ruzatangwa mbere y’amatora.

Uyu mugore w’imyaka 55 w’umusenateri wa leta ya California, yavuze ko atazafata urukingo rwashimagijwe na Bwana Trump rutabanje kwemezwa n’inzobere.

Bwana Pence w’imyaka 61, ubu ukuriye akanama ko muri White House ko kurwanya Coronavirus, yahise asubiza ati: "Kuba ukomeje gusuzugura urukingo ngo kuko ruzaboneka ku butegetsi bwa Trump ndumva nta bwenge burimo."

Aba bakandida bagabanye igihe cyo kuvuga mu buryo urebye bungana, Bwana Pence yavuze iminota 36:27 naho Madamu Harris avuga iminota 36:24.


Isazi yaje imara iminota igera kuri ibiri ku mutwe wa Bwana Pence abantu benshi babitindaho cyane ku mbuga nkoranyambaga

Madamu Harris yavuze ko intambara y’imisoro ya Trump ku Bushinwa yateje kugwa kw’inganda zikora ibikoresho, ati: "Mwatsinzwe intambara y’ubucuruzi.

Mwarayitsinzwe". Pence yasubije ati: "Twatsinzwe iyo ntambara n’Ubushinwa? Joe Biden ntayo yigeze arwana. Joe Biden ahubwo ni umufana wa komunisimu y’Ubushinwa, kuva mu myaka mirongo ishize".

Madamu Harris yanenze ko Bwana Trump yishyuye imisoro ku nyungu ya $750 ku mwaka umwe ari perezida, nk’uko byavuzwe n’iperereza ry’ikinyamakuru New York Times. Ati: "Ubwo nabyumvaga bwa mbere, nahise mvuga nti ’ariko muravuga $750,000?’ ariko bati ’Oya ni $750.’"

Madamu Harris yashinje Trump gukorana n’abanyagitugu ku isi. Bwana Pence avuga ko Trump yategetse ibitero byishe umukuru wa Islamic State Abu Bakr al-Baghdadi n’umujenerali mukuru muri Iran Qasem Soleimani.





Tanga igitekerezo kuri iyi nkuru



Igitekerezo