China: Bari gupima umujyi wose kubera umuntu umwe ufite Covid

U Bushinwa na none buri gupima Coronavirus abantu bose batuye umujyi nyuma y’uko iyi ndwara yongeye kuvugwa mu ntara ya Xinjiang.

Abantu basaga miliyoni 4.7 batuye umujyi wa Kashgar bari gusuzumwa, ubu hamaze kubona abagera ku 138 bayanduye badafite ibimenyetso.

U Bushinwa ni igihugu cyabashije guhangana n’iki cyorezo, kandi gikomeje gukoresha imbaraga nyinshi mu kugihashya aho kibonetse ari gitoya.

Amashuri mu mujyi wa Kashgar utuwe cyane na ba nyamucye bo mu idini ya Islam bitwa Uighur yafunzwe.

Abaturage baho nabo ntibemerewe kuva muri uyu mujyi, kereka abafite icyangombwa ko batanduye.

Umuntu umwe watumye batangira gupima umujyi wose, ni umugore udafite ibimenyetso ukora mu ruganda ruri mu nkengero z’umujyi.

Uwo mugore, ibinyamakuru bya leta byavuze ko bamusanzemo iyi virusi mu "gupima bisanzwe", ni we muntu wa mbere bari babonyemo iyi ndwara mu Bushinwa mu munsi 10 yari ishize.

Gupima umujyi wose byahise bitangira ku wa Gatandatu, abandi bantu 138 banduye bamaze kuboneka.

Kugeza ku Cyumweru nimugoroba abarenga miliyoni 2.8 bari bamaze gupimwa mu mujyi wa Kashgar, abategetsi baho bavuga abasigaye na bo bazapimwa mu minsi ibiri.

Kashgar ni umujyi wo mu ntara Xinjiang mu burengerazuba bw’u Bushinwa, utuwe cyane n’abo mu bwoko bw’aba Uighur b’abasilamu.

Iyi ntara irimo inkambi zifungirwamo abantu leta yita intagondwa. Gusa impirimbanyi z’uburenganzira zibibona nk’uburyo bwo guhonyora umuco, ururimi n’inkomoko ya ba nyamucye batuye aho.

Mu gice kinini cy’u Bushinwa ubuzima busanzwe bwarasubukuye, gusa leta ikoresha gupima abantu benshi bashoboka ahabonetse bacye banduye.

Mu ntangiriro z’uku kwezi, umujyi wose wa Qingdao abawutuye bagera kuri miliyoni icyenda bapimwe Covid-19 mu minsi micyeya.

Mu kwezi kwa Gatanu, u Bushinwa bwapimye Covid-19 abaturage miliyoni 11 bose batuye umujyi wa Wuhan aho iyi ndwara yabonetse bwa mbere.


Si ubwa mbere u Bushinwa busuzumye abantu benshi cyane nyuma yo kubona bacye banduye

ABATUBAJIJE AMAKURU YA CYUMA HASSAN WA ISHEMA TV TWAYABABONEYE UKO ABAYEHO, ABA BANNYAHE BATI "UBU TWAHINDUTSE IMPUNZI MU GIHUGU CYACU", IYUMVIRE BYINSHI MURI IYI VIDEO UTAPFA GUSANGA AHANDI:





Tanga igitekerezo kuri iyi nkuru



Igitekerezo