COVID-19 yazamuye amagambo y’urwango-Guterres wa UN

Mu gitondo cyo kuri uyu wa Gatanu tariki ya 08 Gicurasi 2020, Umunyamabanga Mukuru w’Umuryango w’Abibumbye, Antonio Guterres yatanze ubutumwa buvuga ko iyi virus yabaye icyorezo "yazamuye tsunami y’urwango no kuzira abanyamahanga".

Nta gihugu yatunze urutoki, gusa Bwana yasabye "abantu bose gushyira hamwe" bagahagarika amagambo y’urwango ku isi" muri iki gihe.

Ibikorwa birimo urugomo n’amagambo y’urwango kubera iki cyorezo byibasiye abanyamahanga, abatwara imodoka z’ubwikorezi, abaganga, impunzi n’abandi, byabonetse no mu karere k’ibiyaga bigari.

Bwana Guterres yasabye ibigo bitanga ubumenyi kwibanda ku gutanga ubumenyi ku ikoranabuhanga "muri iki gihe miliyari z’urubyiruko ziri kuri murandasi aho abahezanguni bashaka kurusanga bakaruyobya".

Yasabye itangazamakuru na ba nyiri imbuga nkoranyambaga gusiba amagambo "y’irondaruhu, ayibasira abagore n’ayandi yose y’urwango".

Ati "Ndasaba buri wese, buri hamwe, guhaguruka akamagana urwango agaha icyubahiro buri wese".

Avuga ko muri iki gihe abantu bari kurwana n’icyorezo bicyenewe cyane ko "abantu barengerwa, barindwa kunenwa bakanarindwa urugomo".

Ubu tuvugana imibare y’abanduye icyorezo cya COVID-19 ku isi yageze kuri 3 917 991 (hafi miliyoni 4), naho 270 740 bamaze gupfa mu gihe abarenga Miliyoni imwe bamaze kugikira nkuko Ishami ry’Umuryango w’Abibumbye ryita ku buzima, OMS, ribitangaza.

Leta Zunze Ubumwe za Amerika zongeye kugira umubare w’abantu benshi bishwe na Coronavirus, kuko kuri uyu wa 7 Gicurasi igihugu cyapfushije abantu 2 129, ibi byatumye abamaze gupfa muri iki gihugu bagera ku 76 938 mu gihe abandi 1 292 850 bamaze kwandura.

Ku mugabane w’u Burayi, u Bwongereza bukomeje kuza imbere mu kugira abamaze gupfa benshi kuko ubu bageze ku 30 615.

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa ku Isi, Espagne iza ku mwanya wa kabiri mu banduye kuko ari abantu 256 855, hamaze gupfa 26 070, mu Butaliyani handuye 215 858 hamaze gupfa 29 958, mu Bwongereza handuye 206 715, hamaze gupfa 30 615.

Igihugu cy’u Burusiya cyaje mu bihugu bimaze kugira abanduye benshi kuko ubu gifite abagera ku 177 160, abamaze gupfa ni 1 625, mu Bufaransa handuye 174 791, hamaze gupfa 25 987.

Ku mugabane wa Afurika wose hamaze kugaragara abantu 55 364 banduye Coronavirus, abamaze gupfa basaga 2 083 naho abakize ni 19 118.

Afurika y’Epfo iri imbere mu kugira abafite ubwandu bwinshi kuko ari 8 232, abamaze gupfa ni 161, ikurikirwa na Misiri ifite abanduye ibihumbi 7 981 naho abapfuye ni 482.

Algeria ni cyo gihugu gifite abamaze gupfa benshi kuri uyu mugabane kuko ari 483 mu gihe abanduye ari 5 182

Muri Afurika y’Iburasirazuba, igihugu cya Tanzania kimaze iminsi umunani kitagaragaza imibare y’abanduye cyangwa bishwe na Coronavirus, ni nyuma y’aho Perezida John Pombe Magufuli atangarije ko laboratwari y’igihugu yatangaga amakuru y’ibinyoma kuri iki cyorezo.

Kugeza ubu igihugu kiza imbere mu bwandu bwinshi ni Kenya kuko hamaze kwandura 607 hapfuye 29, Tanzania iraza ku mwanya wa kabiri, kuko handuye 480 hapfuye 16, u Rwanda rufite abanduye 271 abamaze gukira ni 133, muri Uganda ho hamaze kwandura 101, mu Burundi handuye abantu 15 hapfa umwe naho muri Sudani y’Epfo hamaze kwandura abantu 74.


Guterres arasaba abatuye isi kwamagana amagambo y’urwango ruri guterwa na COVID-19





Tanga igitekerezo kuri iyi nkuru



Igitekerezo