COVID-19: Muri RDC umujyi wa Kinshasa washyizwe mu kato

Ku mugoroba wo kuri uyu wa Kabiri tariki ya 24 Werurwe 2020, Perezida wa Repubulika Iharanira Demokarasi ya Kongo, Félix Tshisekedi yaraye atangaje ko igihugu kiri mu bihe bidasanzwe, anatangaza ko umurwa mukuru Kinshasa ubu uri mu kato mu rwego rwo kurwanya icyorezo cya COVID-19 Coronavirus.

Yabitangaje mu ijoro ryakeye mu ijambo ryaciye kuri Televiziyo y’igihugu.

Uretse gufunga imipaka yose y’igihugu, Bwana Tshisekedi yavuze ko binabujije kwinjira cyangwa gusohoka mu murwa mukuru ujya cyangwa uva mu zindi ntara kuva agitangaza iri jambo.

Imodoka, indege n’amato bitwaye imizigo nibyo byemerewe kwinjira i Kinshasa gusa.

Mu cyumweru gishize nibwo iki gihugu cyari cyatangaje ingamba ziburira abantu kugabanya ingendo zitari ngombwa.

Kugeza ubu muri RD Congo imibare y’abanduye Covid-19 igeze kuri 48, batatu bamze gupfa nk’uko bitangazwa na Minisitiri w’Ubuzima Bwana Eteni Longondo.

Dr. Jean-Jacques Muyembe ushinzwe ibikorwa byo kurwanya Covid-19 muri RD Congo yatangaje ko uduce dutatu (municipalities) muri 24 tugize Kinshasa ari two twabonetsemo abanduye benshi.

Benshi muri bo babonetse mu gace kitwa La Gombe, ahantu hatuwe cyane kandi haba ibikorwa by’ubucuruzi byinshi.

Umujyi wa kabiri muri iki gihugu, Lubumbashi, kuwa mbere watangiye ibihe bidasanzwe aho ibintu byose bihagarikwa, kereka ibyangombwa cyane, mu gihe cy’amasaha 48.

Hari habonetse abantu babiri banduye iyi virus, aba bageze i Lubumbashi n’indege ya Congo Airways yavuye i Kinshasa ku cyumweru nk’uko bivugwa na Jacques Kyabula guverineri w’intara ya Katanga.

Abantu 77 bari muri iyo ndege.


Félix Tshisekedi atangaza ko umujyi wa Kinshasa ushyizwe mu kato

Reba uko byifashe mu Mujyi wa Kigali utarangwamo urujya n’uruza rw’abantu n’ibinyabiziga mu kwirinda ikwirakwira ry’icyorezo cya COVID-19:





Tanga igitekerezo kuri iyi nkuru



Igitekerezo