COVID-19: Imikino Olempike yari kuzabera i Tokyo yasubitswe

Impuzamashyirahamwe y’Imikino Olempike ku Isi yatangaje ko nyuma yo kureba uko icyorezo cya Covid-19 kifashe ku isi hafashe umwanzuro wo gusubika iyi mikino yari kuzaba mu kwezi kwa Karindwi i Tokyo mu Buyapani.

Byari biteganyijwe ko iyi mikino mpuzamahanga ikomeye kurusha iyindi ku isi iba hagati ya tariki 24/07 na tariki 09/08/2020 i Tokyo, ikitabirwa n’ibihugu 206 n’abakinnyi barenga 11,000.

Itangazo ry’Impuzamashyirahamwe y’Imikino Olempike ku Isi ryasohotse uyu munsi rivuga ko uyu munsi habaye inama y’abo bireba yafashe umwanzuro w’izi mpinduka.

Iyo nama yahuje uyobora iyo Mpuzamashyirahamwe, Minisitiri w’Intebe w’u Buyapani Shinzo Abe, utegeka umujyi wa Tokyo n’abari bashinzwe gutegura iyi mikino.

Mu Buyapani, abantu barenga 1,100 banduye Covid-19, abagera kuri 42 imaze kubahitana naho 285 barayikize nk’uko bivugwa na OMS/WHO.

Bashingiye ku bivugwa n’Ishami ry’Umuryango w’Abibumbye ryita ku buzima ku isi (OMS/WHO) ku cyorezo cya Covid-19 bavuze ko iyi ndwara yagize ingaruka ku kwitegura kw’abakinnyi ku isi.

Bavuga ko iyi mikino iramutse ibayeho byashyira mu kaga abazayitabira.

Iri tangazo rivuga ko inama yabo yanzuye ko imikino olempike ya 32 yari iteganyijwe isubikwa ntizabe mu 2020 ariko ntizarenze mu mpeshyi ya 2021 itaraba.

Bemeje ko urumuri rw’iyi mikino ruzaguma mu Buyapani mu gihe rutegereje ko imikino iba kandi izagumana izina rya "Olympic and Paralympic Games Tokyo 2020"

Igihugu cya Canada nicyo ejo ku wa Mbere cyari cyatangaje ko niba imikino Olempike ikomeje mu kwezi kwa Karindwi kitazabasha kuyitabira kubera iki cyorezo.

Uko byifashe mu Mujyi wa Kigali utarangwamo urujya n’uruza rw’abantu n’ibinyabiziga:





Tanga igitekerezo kuri iyi nkuru



Igitekerezo