COVID-19: Bwa mbere mu Rwanda hagaragaye abanduye benshi icya rimwe, ubu bageze kuri 36

Kuri uyu wa Mbere tariki ya 23 Werurwe 2020 mu Rwanda hagaragaye abandi barwayi 17 ba COVID-19 biganjemo abaheruka mu ngendo bakoreye hanze y’igihugu, bivuze ko bose hamwe bamaze kuba 36 nkuko Minisiteri y’Ubuzima yabitangaje.

Aba 17 bagaragaye nyuma y’ibipimo bya Minisiteri y’Ubuzima by’ejo ku wa Mbere tariki ya 23 Werurwe 2020.

Minisiteri y’Ubuzima yagaragaje ko aba barwayi bagaragaye baturutse mu bihugu bitanu, aba barimo;

- Abantu icyenda bageze mu Rwanda baturutse i Dubai,
- Abantu batatu bavuye muri Kenya,
- Abantu babiri baturutse muri Leta Zunze Ubumwe za Amerika,
- Umuntu umwe wavuye muri Qatar,
- Umuntu umwe waturutse mu Buhinde
- Umuntu umwe watahuwe ko yahuye n’undi wagaragayeho Coronavirus mu Rwanda.

Kuva byatangazwa ko iki cyorezo cyageze mu gihugu, ni ubwa mbere mu Rwanda hagaragaye imibare y’abanduye benshi icya rimwe.

Minisiteri y’Ubuzima mu Rwanda ivuga ko aba bantu binjiye mu Rwanda batangiye gupimwa no gushyirwa mu kato hagati ya tariki 17 na 20 Werurwe 2020.

Aba ngo bari kuvurirwa ahabugenewe mu gihe kandi hashakishwa abahuye na bo kugira ngo basuzumwe kandi bakurikiranwe.

U Rwanda rwafashe ingamba zikomeye zo guhagarika ibikorwa byose n’ingendo z’abantu mu gihugu mu gihe cy’iminsi 14 uhereye mu ijoro ryo ku wa Gatandatu ushize.

Ingamba nk’izi muri Afurika zatangajwe kandi na Afurika y’Epfo aho zizatangira kubahirizwa ku wa Kane w’iki cyumweru saa sita z’ijoro.

Ba Perezida ba Senegal, Cote d’Ivoire na Zimbabwe na bo baraye batangaje ko ibihugu byabo byinjiye mu bihe bidasanzwe kubera iki cyorezo.

Abanduye iyi ndwara ku Isi bamaze kurenga 380,000 abo imaze kwica barenze 16,000 naho abamaze kuyikira barenze 102,000.

Mu karere k’ibiyaga bigari u Rwanda (36) na RD Congo (45), ni byo bihugu bimaze kubonekamo abanduye benshi.

Muri RD Congo iyi virus imaze kwica abantu babiri umwe yarayikize nk’uko bivugwa na Ministiri w’Ubuzima waho, Eteni Longondo.

- Kenya - 16
- Tanzania - 12
- Ethiopia - 11
- Uganda - 9 (harimo umunani bashya)

Mu Burundi na Sudani y’Epfo nta barwaye iyi ndwara barahaboneka.

Ku wa Gatandatu tariki ya 14 Werurwe 2020 ni bwo mu Rwanda hagaragaye umurwayi wa Mbere wanduye icyorezo cya COVID-19, giterwa na Coronavirus, uyu yari Umuhinde ukorera rimwe mu mashami ya Loni mu Rwanda.

Kuva ubwo imibare yakomeje kugenda izamuka kugeza ubu abafite icyorezo cya COVID-19 bageze kuri 36.

MINISANTE itanga inama ko umuntu ugaragaje ibimenyetso bya COVID-19 yakwihutira guhamagara umurongo utishyurwa wa 114, agahabwa ubufasha adahise akora urugendo, kwipimisha akoresheje Telefoni akanda *114# agakurikiza amabwiriza.

Ushobora no kohereza email kuri callcenter@rbc.gov.rw, gutanga ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.


Itangazo rya MINISANTE rivuga ko ubu mu Rwanda hari abarwayi ba COVID-19 36





Tanga igitekerezo kuri iyi nkuru



Igitekerezo